पोखरा:    वि विल राइज फाउण्डेसनले राष्ट्रव्यापी वृत्तचित्र प्रतियोगिता ‘मेरो गाउँ, मेरो ठाउँ’ २०२३ को दोस्रो संस्करणका लागि भिडियो आह्वान गरेको छ ।  फाउण्डेसनले ओझेलमा परेको पर्यटकीय क्षेत्रको प्रवर्द्धन गर्ने उद्देश्यले आज २०७९ फाल्गुण १२ (शुक्रबार) देखि ७० दिन अर्थात् २०८० वैशाख २१ गतेसम्मका लागि भिडियो पठाउन आह्वान गरेको हो । विजेता प्रतियोगीहरूको घोषणा १३ जेष्ठ २०८० का दिन काठमाडौँमा हुनेछ । पर्यटकीय दृष्टिकोणले प्रचुर सम्भावना भएर पनि ओझेलमा परेका कुनै पनि महत्त्वपूर्ण प्राकृतिक, सांस्कृतिक सम्पदा, भेषभुषा, जातजातिको पहिचान, खानपान, कलासंस्कृति लगायतका विषयवस्तुमा केन्द्रित रही वि विल राइज फाउण्डेसनले राष्ट्रव्यापी वृत्तचित्र प्रतियोगिता ‘मेरो गाउँ, मेरो ठाउँ’ को आयोजना गर्दै आएको छ । सन् २०१९ मा पहिलो पटक आयोजित प्रतियोगितामा देशभरबाट उत्साहजनक रूपमा १३२ वृत्तचित्र सहभागी थिए । सन् २०२० मा प्रतियोगिताका लागि भिडियो आह्वान भए पनि विश्वभर फैलिएको कोभिड १९ महामारीका कारण कार्यक्रम स्थगित हुन पुग्यो । यसअघि सन् २०२० को भिडियो च्यालेञ्जमा सहभागी प्रतियोगीहरूले आफूले पठाइसकेको भिडियोमा परिवर्तन गर्नुपर्ने आवश्यक ठानेमा सो भिडियो सम्पादन गरी वा नयाँ नै पनि पठाउन सक्नेछन् । ‘मेरो गाउँ, मेरो ठाउँ २०२३’ प्रतियोगितामा यसअघि सहभागी नभएका नयाँ प्रतियोगीहरूले समेत सहभागिता जनाउन सक्ने फाउण्डेसनले जनाएको छ । भिडियो निर्माताहरुले प्रचुर पर्यटकीय सम्भावना भएर पनि ओझेलमा परेका कुनै पनि गाउँ–ठाउँको प्राकृतिक, सांस्कृतिक सम्पदा, भेषभुषा, खानपान, कलासंस्कृति, जातजातिको पहिचान लगायतका विषयहरूलाई आधार बनाएर भिडियो तयार पार्न सक्नेछन् । वृत्तचित्र अधिकतम ५ मिनेटको हुनुपर्नेछ । प्राप्त भिडियोहरूमध्येबाट निर्णायकले छनौट गरेका उत्कृष्ट दशलाई नगदसहित ‘मेरो गाउँ, मेरो ठाउँ’ अवार्ड प्रदान गरिनेछ । कोरोनाका कारण थलिएको पर्यटन क्षेत्रलाई उकास्न र यस क्षेत्रलाई चलायमान बनाउन यस्ता कार्यक्रमको उपादेयता अझ बढेर गएको छ । यस प्रतियोगिताले देशैभर ओझेलमा रहेका पर्यटकीय थलोहरू पहिल्याउन महत्त्वपूर्ण भूमिका खेल्ने र प्राप्त वृत्तचित्रहरूको उचित प्रचारप्रसार गर्न सके यो आन्तरिक तथा बाह्य पर्यटन प्रवर्द्धनका लागि ठूलो सहयोगी हुन सक्नेमा फाउण्डेसन विश्वस्त छ । सहभागीले फाउण्डेसनको आधिकारिक वेबसाइट डब्लुडब्लुआरएफ डट ओआरजी डट एनपी  www.wwrf.org.np  मार्फत फर्म भरी सहभागिता जनाउन सक्नेछन् । प्रतियोगितामा सहभागिता लागि कुनै किसिमको शुल्क लाग्ने छैन ।

पोखरा:   पोखरामा जापान फाउण्डेशन दूतावास जापानको आयोजना र भाषा संघ नेपालको सहकार्यमा आजदेखि पोखरामा जापनीज चलचित्र महोत्सव हुने भएको छ ।  पोखरामा आज (शुक्रबार) र शनिबार हुने जापनीज चलचित्र महोत्सव प्रर्दशन हुने छ भने, काठमाडौंमा शनिबार र आइतबार महोत्सव हुनेछ ।  पोखरामा पोखरा उद्योग वाणिज्य संघको सभाहल र काठमाडौंको राष्ट्रिय नाचघर जमालमा हुनेछ । महोत्सव अवलोकन निशुल्क रहेको आयोजकले जनाएको छ ।

पोखरा:    छँगेली नेवा खल, पोखराको आयोजनामा भैरव नाच कार्यक्रम हुने भएको छ । फागुन २४ गते पोखरा फुलबारीमा नाच आयोजना गर्न लागिएको छँगेली नेवा खल, पोखराका अध्यक्ष शिबलाल मल्लले जानकारी दिए ।    नाच सम्पन्न गर्नका लागि  विभन्न ६ वटा उपसमिती बनाइएको छ ।  मुल समारोह व्यवस्थापन समितीको संयोजक शिबलाल मल्ल, सदस्यहरुमा तेजकुमार मल्ल, भरत कर्माचार्य, रुद्र मल्ल, विष्णुकुमार श्रेष्ठ , बुद्धी मल्ल, रमेश मल्ल, सुर्य राजभण्डारी विश्णुश्याम मल्ल रहेका छन् । यस्तै पुजा व्यवस्थापन उपसमितीमा सुना मल्लको संयाजकत्वमा सदस्यहरु निर्मला मल्ल नारायणी श्रेष्ठ, लक्ष्मण मल्ल , अन्जु मल्ल, अर्मिला मल्ल, लक्ष्मी मल्ल, शान्ती कर्माचार्य, बिन्दु मल्ल, सरस्वती मल्ल रहेका छन् । प्रचारप्रसार उपसमितीमा सन्जय मल्ल संयोजक तथा जयराम कायस्थ, रामप्रताप मल्ल, मनिराज मल्ल सदस्य छन् । कार्यक्रम सफल बनाउन अर्थिक व्यवस्थापन उपसमितीमा प्रल्हादभक्त कायस्थ संयोजक, हेमन्त मल्ल, श्याम मल्ल, कृष्ण मल्ल सदस्य रहेका छन् । खाना व्यवस्थापन उपसमितीमा बालकृष्ण श्रेष्ठ संयोजक, मिलन श्रेष्ठ, ज्ञाननारायण श्रेष्ठ, लक्ष्मण मल्ल सदस्य छन् । स्वयमसेवक व्यवस्थापन उपसमितीमा संयोजक मोहन मल्ल, सदस्यहरु रविन्द्र मल्ल, सुरेन्द्र मल्ल, सुर्यकुमार श्रेष्ठ, इश्वर कर्माचार्य, सन्जय श्रेष्ठ, सुमन कायस्थ रहेका छन् ।  तनहुँको साविक छांग गाविसबाट बसाइसराइ गरि पोखरा बसोबास गरेकाहरुले २०७२ सालमा ाछांगेली नेवाः खल पोखराको स्थापना गरेको थियो ।

काठमाडौं:  तीन मिनेटभित्र १८४ वटा सेल्फी खिच्दै बलिउड अभिनेता अक्षय कुमारले गिनिज विश्व कीर्तिमान राखेका छन् । मुम्बईमा बुधबार आयोजित समारोहमा अक्षयले कीर्तिमान रचेका हुन् । रेकर्ड राखेसँगै कार्यक्रममा उनलाई गिनिज प्रमाणपत्र पनि प्रदान गरिएको छ ।   आफ्ना खतरनाक स्टन्टको कारण चर्चामा आउने अक्षय यसपटक चाहिं सेल्फीले चर्चामा आएका हुन् । उनको शीर्ष भूमिका रहेको फिल्म ‘सेल्फी’ पनि शुक्रबार विश्वव्यापी प्रदर्शन हुँदैछ । राज मेहता निर्देशित यो फिल्ममा उनले पहिलोपटक इमरान हासमीसँग स्क्रिन सेयर गरेका छन् ।   धेरै सेल्फी खिचेर अक्षयले अमेरिकाका जेम्स स्मिथको १६८ वटा सेल्फीको रेकर्डलाई तोडेका हुन् । हलिउड अभिनेता डाउने जोन्सनले पनि लण्डनमा आयोजित फिल्मको प्रिमियरमा तीन मिनेटभित्र १०५ वटा सेल्फी खिच्दै रेकर्ड राखेका थिए । यो अनौठो कीर्तिमान तोड्न पाउँदा खुसी व्यक्त गर्दै अक्षयले आफू उत्साहित भएको बताए ।   उनले भने, ‘यो अनौठो विश्व कीर्तिमान तोड्न पाउँदा र मेरा फ्यानसँग यो पल साझा गर्न पाउँदा म उत्साहित छु । मैले अहिलेसम्म प्राप्त गरेको सबै कुरा र मेरो जीवनको यो क्षणमा जहाँ छु, त्यो मेरा फ्यानको निःसर्त माया र समर्थनको कारण हो । यो उनीहरुका लागि श्रद्धा व्यक्त गर्ने एक शैली थियो जसले जीवनभर मेरो करिअरमा उभिएर मलाई माया गरे अनि स्वीकार ।’   यसैबीच, ‘सेल्फी’मा डायना पेन्टी र नुसरत भरुचा पनि मुख्य भूमिकामा छन् । फिल्म शुक्रबारदेखि रिलिज हुँदैछ ।

पोखरा:   पोखरास्थित क्षेत्रीय संग्रहालय संघीयता कार्यान्वयनसँगै प्रदेश संग्रहालयमा रुपान्तरण भएको चार वर्ष बढी भएको छ ।  आन्तरिक तथा बाह्य पर्यटकलाई मध्यनजर गर्दै २०४१ सालमा सर्वसाधारणका लागि खुल्ला गरिएको क्षेत्रीय संग्रहालयमा कति लगानी भएको छ भन्ने यकिन तथ्याङ्क छैन् । प्रदेश संग्रहालयमा रुपान्तरण भएपछि कार्यालयको जिम्मेवारीमा करुणा राई रहेकी छिन् ।   पोखरा महानगरपालिका ९ नयाँबजारस्थित प्रदेश संग्रहालयको जिम्मेवारी संघीयतापछि प्रदेश सरकारको काधमा आएको छ । २३ रोपनी क्षेत्रफलमा फैलिएको यस संग्रहालयमा चार वटा प्रदर्शनी कक्षहरु छुट्याएर गण्डकी प्रदेशमा बसोबास गर्ने विभिन्न जातजातिका दैनिक जीवनशैली,भेषभुषा, गरगहना,बाजागाजा, कृषि औजारसँगै जातिहरुको प्रतिकृति, देवीदेवताका मूर्तिहरु तथा संस्कृति सम्बन्धि विभिन्न साम्रगीहरु संग्रालयमा प्रदर्शनमा रहेको कार्यालय प्रमुख राईले बताइन् ।  गण्डकी प्रदेशका विभिन्न जातजातिको भाषाशैली र जिवनशैली र लोपउन्मुख संस्कृति बुझ्न संग्रहालयले महत्वपूर्ण भुमिका निर्वाह गर्ने कार्यालय प्रमुख राई बताउछिन ।  ‘पोखरा एक पर्यटकहरुको केन्द्र हो, आन्तरिक तथा बाह्य पर्यटकहरुलाई मध्यनजर गर्दै तत्कालिन क्षेत्रीय संग्रहालय अहिले प्रदेश संग्रहालयमा रुपान्तरण भएको छ, उनले भनिन्, ‘ विभिन्न जातजातिको भाषाशैली र जिवनशैली बुझ्न र लोपउन्मुख  संस्कृति बुझ्न संग्रहालयले महत्वपूर्ण भुमिका निर्वाह गर्छ ।’ उनले संग्रहालयमा नवलपुरदेखि मनाङ मुस्ताङसम्को भाषा, शैलीदेखि संस्कृति बुझ्न संग्रहालयले महत्वपुर्ण योगदान गरेको बताईन् । संग्रहालयमा आउने पर्यटकलाई पुजा राईले गाइड गर्ने गरेकी छन् । संग्रहालयका अनुसार यहाँ कर्मचारीको अभाव रहेको छ ।  घाटामा चल्छ प्रदेश संग्रहालय संघीयता कार्यान्वयन भएसँगै क्षेत्रीय संग्रहालयबाट प्रदेश संग्रहालयमा रुपान्तरण भएको संग्रहालय घाटामा चलिरहेको छ ।  प्रदेश संग्रहालय पोखराका कार्यालय प्रमुख राईले संग्रहालय घाटामा रहेको स्विकार गर्दै संग्रहालयले राजश्व संकलन भन्दा प्रदेशको संस्कृतिको संरक्षणमा जोड दिएको बताईन ।  ‘कर्मचारी व्यवस्थापनदेखि पूर्वाधार र मर्मत सम्भारमै लाखौ खर्च हुन्छ’, राईले भनिन्, ‘संग्रहालयबाट राजश्व संकलन भन्दा पनि तत्कालिन पश्चिमाञ्चल विकास क्षेत्र र हालको गण्डकी प्रदेशका जिल्लाहरुको विभिन्न जातजातिको संस्कृति संरक्षणमा जोड हो ।’ उनका अनुसार राजश्व संकलन गर्ने लक्ष्य नभएको भन्दै अन्य स्थानमा भन्दा यस संग्रहालयमा टिकट दर सस्तो रहेको छ । ‘राजश्व संकलन गर्ने लक्ष्य भए हामीले टिकट दर बढाउनुपर्छ तर लोपउन्मुख वस्तु तथा संस्कार संस्कृति पुस्तातरण गर्नु संग्रहालयको प्रमुख उद्धेश्य पनि हो’ उनले भनिन् ।  कार्यालय प्रमुख राईका अनुसार प्रदेश संग्रहालयले चालु आर्थिक वर्षको माघको १७ गतेसम्म १४ लाख ४ हजार ९ सय ५० रुपैँया राजश्व संकलन गरेको छ ।  राईका अनुसार क्षेत्रीय संग्रहालय प्रदेश संग्रहालयमा रुपान्तरण भएपछि गत आर्थिक वर्ष ९ हजार २ सय ३७ जनाले संग्रहालयको अवलोकन गरेका छन् । भने १६ लाख २ हजार ८ सय ६० रुपैया राजश्व संकलन भएको हो ।  कोभिडका कारण केही महिना बन्द भएको संग्रहालयमा आर्थिक वर्ष ०७७/७८ मा ८ सय ९७ जनाले अवलोकन गर्दा १८ हजार ३ सय १० रुपैयाँ राजश्व संकलन भएको छ । भने आर्थिक वर्ष ०७६/७७ मा ५ हजार ८ सय २५ जनाले अवलोकन गर्दा १६ लाख ८ हजार ७ सय ३५ रुपैयाँ राजश्व संकलन भएको छ ।  कार्यालय व्यवस्थापका लागि प्रदेश सरकारले चालु आर्थिक वर्षका लागि ४ करोड २३ लाख ७५ हजार रुपैयाँ पुँजीगत खर्चसहित छुट्याएको लेखा अधिकृत शोभाखर ढकालले बताए ।  प्रदेश संग्रहालयमा १० जनाको दरबन्दीको भएपनि १२ जना कर्मचारीको रहेको बताउँदै २ जनालाई करारमा नियुक्त गरेको कार्यालय प्रमुख राईले बताईन् ।  संग्रहालयलाई थप व्यवस्थित गर्न प्रदेश सरकारको बजेटमा पुस्तकालयसहित कार्यालय रहने गरी १ करोड ८९ लाख ८६ हजार ६सय २२ रुपौयाँको लागतमा नयाँ भवन निर्माण गरेको छ । यस्तै संग्रहालयको भवन संरक्षण गर्न प्रदेश सरकारको सहयोगमा ३५ लाखको लागतमा संग्रहालय वरपर वाल निर्माण गरेको छ ।  बतास बदर्शले सडक तर्फको भाडामा लिएको भवन एक वर्ष अगाडी खाली गरेको छ । २०६७ सालमा भाडा प्रयोग गरिरहेको बतास बदर्शले सम्झौताको केही वर्षपछि उक्त भवन खाली गरेसँगै त्यस भवनमा पुस्तकालय, गण्डकी प्रदेशका विभिन्न जिल्लाको श्रव्यदृश्य प्रस्तुत गर्ने गरी सभाहल निर्माण गर्न करिव २२ करोडको लागतमा भवन बनाउन डिपियार तयार भएको प्रदेश संग्रहालयले जनाएको छ ।  प्रदेश संग्रहालयमा चार कक्ष, कुन कक्षमा के अवलोकन गर्ने ? गण्डकी प्रदेश संग्रहालय पोखरामा गण्डकी प्रदेशका विभिन्न जिल्लामा बसोबास गर्ने जातजातिको दैनिक जीवनशैली देखि पुराना धातुहरु संग्रहालयमा राखिएको छ ।   मंलबार बाहेक अन्य बार आन्तरिक तथा बाह्य पर्यटकहरुको लागि खुल्ला हुने संग्रहालय प्रवेशका लागि १० देखि १०० रुपैयाँसम्म टिकट दर कायम गरिएको प्रदेश संग्रहालयले जनाएको छ ।  विद्यार्थीहरुको लागि १०, सार्क राष्ट्रका लागि ५० र अन्य राष्ट्रका पर्यटकहरुलाई १०० यस्तै अन्यका लागि नेपाली २५, सार्क राष्ट्र ५० र अन्य राष्ट्रका लागि १ सय नै टिकट दर कायम छ ।  संग्रहालयलाई चार कक्षमा विभाजन गरेको छ भने बाहिर खाली जग्गामा बाल उद्यान देखि पर्यटकलाई आकर्षणका निम्ति बगैचा निर्माणसँगै विभिन्न जनावरको आकृति निर्माण गरिएको छ ।  पहिलो कक्ष,  प्रदेश संग्रहालयको पहिलो कक्षमा गण्डकी प्रदेशका विभिन्न जिल्लाबाट संकलित साम्रगीहरु पहिलो कक्षमा अवलोकन गर्न सकिन्छ । प्रदेशक विभिन्न क्षेत्रमा बसोबास गर्ने जातजातिले प्रयोग गर्ने भाँडावर्तन, भेषभुषा तथा गरगहनाहरु पहिलो कक्षमा अवलोकन गर्न सकिन्छ ।  दोस्रो कक्ष, (मुस्ताङ ग्यालरी) संग्रहालयको दोस्रो कक्षमा नेपाल र जर्मनीका संयुक्त टोलीले मुस्ताङमा अवस्थित प्राचिन गुफा सन् १९९४÷९५ मा उत्खनन् गर्दा प्राप्त भएका पुरात्वाविक वस्तुहरु राखिएका छन् । यस कक्षमा माटोको भाडाकुँडा, माला, धातुका हातहरियार, काठका हतियार, हाडका साम्रगी तथा गहना, ढुङ्गाका औजार, माटोको साना भाँडावर्तन, धातुका गहनासँगै नेपालको पहाड र हिमालमा भएको सभ्यताको विकासक्रमको बारेमा जानकारी प्राप्त हुन्छ । तेस्रो कक्ष प्रदर्शनीको तेस्रो कक्षमा साविक पश्मिाञ्चल विकास क्षेत्रको विभिन्न स्थानबाट चोरी–ठगी बरामद भएका जिल्ला अदालत कास्कीबाट हस्तान्तरण भएका १७ औं शताव्दीका स्थानीय देवी देवताका मूर्तीहरु, हिमाली लामा, कुमार कात्र्तिकेय, तिब्बती कलाशैलीको लामा, हनुमान, राधाकृष्ण,विष्णु, तारा, शाक्यमुनि बुद्धसँगै बाजा गाजा, हातहतियार, नापपौतलका औजारका अतिरिक्त गुरुङ पुरोहितका प्रतिकृतिहरु समेत प्रदर्शनमा राखिएको छ । यस्तै यसै कक्षमा संग्रहालयले परम्परागत घुमाउने घर निर्माण गरेको छ । हनि हन्टिङलाई समेत सग्रहालयमा जोड्न लागिएको प्रदेश संग्रहालयले जनाएको छ ।  चौथो कक्ष संग्रहालयको चौथो कक्षमा थारु, दुरा, थकाली र दलित जातीले दैनिक जीवनमा प्रयोग गर्ने सामाग्री तथा औजारहरु र हिन्दु परम्परामा गरिने विवाह र मृत्यु संस्कारका कृतिहरु चौथो कक्षमा प्रदर्शनीका लागि राखिएको छ ।   

पोखरा:     आलु गाउँका रुपमा ख्याती कमाएका कास्कीको हेमजामा आगामी चैत २६ गतदेखि बैशाख ३ गतेसम्म ११ औं राष्ट्रिय हेमजा आलु महोत्सव हुने भएको छ ।  ‘सुन्दर ठाउँ हेमजा जाउँ, आलुका स्वादिष्ट परिकार खाउ, आलु एक परिकार अनेक’ भन्ने मूल नाराका साथ विष्णु्पादुका  खेलमैदान पोखरा २५ हेमजामा हुने छ । मंगलबार हेमजामा बसेको भेलाले सुबिन श्रेष्ठको संयोजकत्वमा मुल आयोजक समिति गठन गरेको छ ।समिति महासचिवमा वसन्तकुमार श्रेष्ठ, सचिवमा चन्द्रमान श्रेष्ठ तथा कोषाध्यक्षमा मधुर कुँवर  रहनु भएको छ । भेलाले विभिन्न उपसमिति पनि गठन गरेको छ । अर्थ संकलन उपसमिति संयोजकमा डम्बरबहादुर कुँवर, लेखा उपसमिति संयोजकमा राम सापकोटा, स्टल रेस्टुरेस्ट उपसमिति संयोजकमा राजेन्द्र थापा, आमा समूह परिचालन उपसमिति संयोजकमा उमा भुर्तेल, अतिथि सत्कार उपसमिति संयोजकमा शान्ता केसी, सांस्कृतिक उपसमिति संयोजकमा दानबहादुर थापा, सुरक्षा व्यवस्थापन उपसमितिको संयोजकको जिम्मेवारी डम्बरबहादुर अधिकारीलाई दिइएको छ । भेलाले पानी बिजुली उपसमिति संयोजकमा केशव गिरी, यातायात तथा पार्किङ उपसमिति संयोजकमा बिपिन थापा, बैंक तथा बित्तीय संघसंस्था समन्वय उपसमिति संयोजकमा कृष्ण पौडेल,  स्वयंसेवक परिचालनमा अस्बिन थापा,  प्रचारप्रसार उपसमितिमा निराजन अधिकारी, झाँकी ¥याली व्यवस्थापनमा पार्वती बाँस्तोला,  कृषि परिचालन उपसमिति जयराम तिमिल्सिना, प्राथमिक उपचारमा अनिल पौडेल, छपाइ तथा अनलाइन व्यवस्थापनमा नरेस सिरस र वैदेशिक समन्वयमा मनोज कार्कीले पाउनु भएको छ । वि.स २०६६ सालदेखि वार्षिक रुपमा चैतमा हुँदै आएको उक्त महोत्सवको पहिलो संस्करण स्थानीय बहुउद्देश्यीय किसान सहकारी संस्थाले, दोस्रो संस्करण तत्कालिन हेमजा गाविसले तथा तेस्रो संस्करणदेखि लगातार विष्णुपादुका क्लबले गर्दै आएको थियो । कोरोना भाइसरको संक्रमणका कारण बिगत ३ बर्षदेखि स्थगित भएको महोत्सव यस बर्षदेखि निरन्तर दिन लागिएको हो । क्लबका अध्यक्ष सुबिन श्रेष्ठको अध्यक्षतामा बसेको भेलाको सञ्चालन सचिव बसन्तकुमार श्रेष्ठले गर्नु भएको थियो ।

काठमाडौँ:  बिरिसु मिडियाको आयोजनामा हुन लागेको “दोस्रो स्टार म्युजिक एण्ड फिल्मस अवार्ड –२०८० को आवेदन फारम खुल्ला भएको छ । काठमाडौँको कालिस्थानस्थित कटिया हाउसमा एक पत्रकार सम्मेलन गरी उक्त जानकारी गराएको हो । अवार्ड ८० बिधामा गर्न लागिएको र अवार्डको लागि २०७९ फागुन ६ गतेदेखी चैत्र ११ गते सम्म फारम खुल्ला रहने छ । अवार्डको टप ५ नोमिनेशन चैत्र २५ गते शनिबार सार्वजानिक गरिने बिरिसु मिडियाका अध्यक्ष विवेक लोप्चनले बताए । आवेदन फारम अनलाइनबाट दर्ता गर्नको लागि कmकब।दष्चष्कगलभधक।अयm क्लिक गरी भर्न सकिने र फारम दर्ता शुल्क अनलाइनबाट भुक्तानी गर्न सकिनेछ ।  साथै अवार्डको आवेदन फारम भर्नको लागि बिग परिवेश स्टुडियो अनामनगर ९८५१०५३०५२(मनोज डंगोल), डाँडापारी सन्देशको कार्यालय बनेपा ९८४९८७८१८४ (इकमान लामा), विराटनगर ९८४३८३३३९२ (ज्ञान गुरुङ), पोखरा (सुदर्शन रन्जित ९८०६६०२५००), इटहरी पुर्वान्चल रेकर्डिङ स्टुडियो (रुद्र श्रेष्ठ ९८१५३०६७१७), गोङगबु ९८४१६१६९९७(लक्षु प्रकाश मल्ल), ९७६२४५२२९७(बिरिसु मिडिया) , बौद्ध ९८६५०९१२१९(बैरागी मोक्तान), नरेन भट्टराइ कमलादी ९८४८७९८००३, ९८५११९५२९० (प्रकाश बराइली)  लाई  सम्पर्क गर्न सकिने आयोजक पक्षले बताएको छ । अवार्डमा २०७७ चैत्र २५ गतेदेखी २०७९ चैत्र ११ गतेसम्म भित्रका गीत संगीतलाई समावेश गरिने छ । फारम दर्ता शुल्क नेपालबाट एक हजार रुपैँया र बिदेशबाट १५ सय रुपैँया लाग्नेछ । अवार्डमा एस. एम. एस.भोटिङ्बाट आएको अंकलाई ५० % र जुरिको निर्णय ५० % हुने आयोजक टिमले बताएको छ ।  मिडिया संयोजनको जिम्मा सञ्चारकर्मी प्रकाश बराइली ‘अभिव्यक्ती’ ले लिएका छन । गीत संगीत, टेलिसियल र त्यस सँग सम्बन्धित सबै पक्षलाई समिटेर यस अवार्ड गर्न लागिएको गर्न लागिएको र यस क्षेत्रमा योगदान पुर्याउनुहुने सबैलाई सम्मान, हौसला, प्रेरणा साथै अवार्ड समेत प्रदान गरिने बिरिसु मिडियाका अध्यक्ष लोप्चनले बताए । अध्यक्ष लोप्चनले समाजमा विशेष योगदान दिदै आएका खेलकुद, शिक्षा, स्वास्थ्य र सञ्चार क्षेत्रका व्यक्तीहरुलाई सम्मान गरिने बताए । डिबी बम्जनको प्रमुख आतिथ्यतामा सम्पन्न भएको उक्त पत्रकार सम्मेलनमा कलाकार, पत्रकार एबं विभिन्न संघ संस्थाका प्रतिनिधिहरुको उल्लेखनीय सहभागिता रहको थियो ।कार्यक्रम सञ्चारकर्मी राजाकुमार रायमाझीले सञ्चालन गरेका थिए ।

पोखरा:   गण्डकी प्रदेशका आन्तरिक मामिला तथा कानूनमन्त्री रोशन गाहामगरले जनासँख्याले मात्रै प्रशासनिक र राजनीतिक पहुँच स्थापित गर्न नसक्ने बताएका छन् ।   त्रिभुवन विश्वविद्यालयको दोस्रो ठुलो आंगिक क्याम्पस पृथ्वीनारायण क्याम्पसमा आदिवासी जनजाति विद्यार्थी संघ पिएन क्याम्पस कमिटीले आयोजना गरेको ‘वृहत खुल्ला सांस्कृतिक तथा मौलिक नृत्य प्रतियोगिता एवं प्रशिक्षण तथा परिचयात्मक कार्यक्रम’ लाई सम्बोधन गर्दै मन्त्री गाहामगरले यस्तो धारणा राखेका हुन् ।    उनले आदिवासी जनजाति समुदायको जनसँख्या धेरै भएपनि पहुँचको हिसाबले कमजोर रहेको बताए ।  ‘आदिवासी जनजाति समुदाय संख्याको हिसाबमा धेरै छौं । सँख्याको हिसाबमा धेरै भएपनि विचार, संघर्ष र पहुँचमा पछाडी छौं, मन्त्री गाहामगरले भने, ‘त्यसैले अब आदिवासी जनजातिको मौलिक हकका निम्ति एकढिक्का र गम्भीर हुन जरुरी छ ।’   उनले एकताले मात्रै पहुँच स्थापना हुन नसक्ने बताउदै शैक्षिक सशक्तिकरणको आवश्यकता रहेको उल्लेख गरे ।   मन्त्री गाहामगरले जनजाति साँस्कृतिक हिसाबले धनी रहेको बताउदै संरक्षणको जरुरी रहेको बताए । ‘हामी कल्चर र नेचरले धनि छौं, यसको संरक्षण हुन नितान्त जरुरी । तपाइहरु विद्यार्थी जीवनबाट नै पढ्दै सिक्दै संस्कृति संरक्षणको विषयमा गम्भीर हुन आवश्यक छ । । किनभने हाम्रो मौलिक तथा ऐतिहासिक संस्कृति र परम्परा बचाउनुपर्ने अवस्था आएको छ ।’ उनले भने ।   मन्त्री गाहामगरले विद्यार्थी नेताहरुलाई फरक–फरक पार्टीमा आवद्ध भएपनि समुदायको अधिकार प्राप्तिका लागि एकढिक्का भएर लाग्नसमेत सुझाब दिएका थिए ।   नृत्य प्रतियोगितामा डिडी डान्स स्टुडियो प्रथम   आदिवासी जनजाति विद्यार्थी संघ पिएन क्याम्पस कमिटीकाे आयोजना र नेपाल मगर विद्यार्थी पृथ्वीनारायण क्याम्पसको सहआयोजनामा सम्पन्न वृहत खुल्ला सांस्कृतिक तथा नृत्य प्रतियोगितामा सामुहिकतर्फ डिडी डान्स स्टुडियो प्रथम भएको छ ।       यस्तै न्यू ग्यालेक्सी बोर्डिङ स्कुल द्धितीय, फुलमुन डान्स स्टुडियो तृतीय र दीप मगर समाज र ज्ञानु बाबा बोर्डिङ स्कुलले सान्त्वना स्थान हाँसिल गरे ।    सामुहिक नृत्य प्रतियोगितामा प्रथम, द्धितीय, तृतीय र सान्त्वना भएका समूहलाई क्रमशः १२ हजार, ८ हजार, ५ हजार रसान्त्वना भएका दुई समूहलाई समान २÷२ हजार नगद राशी प्रदान गरेको आयोजक संस्थाका अध्यक्ष अर्जुन बरामले जानकारी दिए ।   उनका अनुसार एकल नृत्यतर्फ यसोधा रोका प्रथम, सरु खत्री द्धितीय र डानियाल तृतीय भइन् । उनीहरुले क्रमशः ५ हजार, ३ हजार र २ हजार पुरस्कार प्राप्त गरेका थिए ।     

काठमाडौं:  मोरङमा कलाकार पवन खतिवडालाई प्रहरीले नियन्त्रणमा लिएको छ।    बेलबारी नगरपालिका-१ स्थित एक होटलबाट उनलाई नियन्त्रणमा लिएको जिल्ला प्रहरी कार्यालयका प्रहरी नायब उपरीक्षक (डिएसपी) टीकाबहादुर कार्कीले जानकारी दिए।    मादक पदार्थ सेवन गरी होहल्ला र कुटपिट गरेको भन्दै उनलाई प्रहरीले नियन्त्रणमा लिएको हो। बेलबारी ४ का जीवन कार्कीलाई कुटपिट गरेको आरोप उनीमाथि छ। उनीसँगै रमेश भण्डारीलाई पनि प्रहरीले नियन्त्रणमा लिएको हो।   पीडित पक्ष इलाका प्रहरी कार्यालय बेलबारीमा आएर अहिलेसम्म जाहेरी भनेको दिएको छैन।   ‘छलफलको लागि दुवै पक्ष आउने भनेका छन्,’ उनले भने, ‘पीडितले जाहेरी दिए प्रहरीले कारबाहीको प्रक्रिया अगाडि बढाउने छ।’   पीडित पक्षका आफन्तहरू प्रहरी कार्यालय आउँदै गरेको र मिलापत्र भएको अवस्थामा मात्रै उनलाई छाडिने बताए।   उनको युट्युब च्यानल छ। आफ्नो युट्युब च्यानलबाट प्रसारित सर्ट भिडिओमा ‘म्याकुरी' थेगोले उनी चर्चित छन‍्।