पोखरा । युवाहरूबीच आपसी भाइचारा अभिवृद्धि गर्ने उद्देश्यसहित पोखरामा सुलभ प्रिजेन्टस् थ्रि भर्सेस थ्री खुल्ला पुरुष तथा महिला बास्केटबल प्रतियोगिता आयोजना हुने भएको छ । भगवती युवा क्लब राखु म्याग्दीको आयोजनामा आगामी साउन २ गतेदेखि पोखरा रंगशालाको कभर्ड हलमा प्रतियोगिता सञ्चालन हुन लागेको हो । ‘सामाजिक चेतना, अनुशासन गतिशीलता, स्वाभिमान र विकास, क्लबको पहिचान’ भन्ने मूल नारासहित स्थापित क्लबले म्याग्दी बाहिर पहिलो पटक प्रतियोगिता आयोजना गर्न लागेको बुधबार आयोजित पत्रकार सम्मेलनमार्फत जानकारी दिएको हो । सो प्रतियोगितामा पुरुषतर्फको विजेताले नगद ४२ हजार २ सय २२ रुपैयाँ, ट्रफी, मेडलसहित आकर्षक गिफ्ट ह्याम्पर प्राप्त गर्नेछन् भने उपविजेता हुने टिमलाई नगद २२ हजार २ सय २२ रुपैयाँ, ट्रफी, मेडलसहित गिफ्ट ह्याम्पर प्रदान गरिने प्रतियोगिता संयोजक सुलभ मल्ले जानकारी दिए । उनका अनुसार महिलातर्फ विजेता तथा उपविजेता हुने टिमले क्रमश नगद २५ हजार २ सय २२ रुपैयाँ र १५ हजार २ सय २२ रुपैयाँ, ट्रफी, मेडलसहित विभिन्न गिफ्ट ह्याम्पर प्राप्त गर्नेछ । प्रतियोगितामा तनहुँ, कास्की, म्याग्दी, काठमाडौँ र पर्वत लगायतका खेलाडीहरुको सहभागिता छ भने पुरुषतर्फ १५ र महिलातर्फ ५ टिमको सहभागिता रहने आयोजकले जनाएको छ ।
फिफा विश्वकप-२०२६ अन्तर्गत भर्खरै सकिएको खेलमा स्विट्जरल्यान्डलाई ३-१ गोल अन्तरले पराजित गर्दै अर्जेन्टिना सेफिफाइनमा प्रवेश गरेको छ। अतिरिक्त सयममा भएको २ गोलसँगै अर्जेन्टिनाले सानदार जित निकालेको हो। खेलको ११२ औँ मिनेटमा अल्भारेजको गोलमा अर्जेन्टिनाले १-२ अग्रता बनाएको थियो। अतिरिक्त समयको इन्ज्युरी टाइमको अन्तिममा मार्टिनेजको गोलमा अर्जेन्टिनाले सेमिफाइनल यात्रा तय गरेको हो। अतिरिक्त समयमै अर्जेन्टिनाका अल्भारेजले खेलमा दोस्रो गोल गरेका थिए। अमेरिकाको कान्सास सिटी स्टेडियममा भएको खेलको निर्धारित ९० मिनेटमा दुवै टोलीले १-१ गोलको बराबरी गरेपछि खेल अतिरिक्त समयमा गएको थियो। खेलको ७२ औँ मिनेटमा ब्रिन एम्बोले रातो कार्ड खाँदै मैदान छाडेपछि स्वीटजरल्यान्ड १० खेलाडीमा समेटियो। यद्यपी टोलीले विश्व च्याम्पियनलाई कडा टक्कर दिँदै दबाबमा राखेको थियो। ब्रिन एम्बोलोले दोहोरो पहेँलो कार्ड पाएर बाहिरिएका हुन्। पहिलो हाफको खेल सकिँदा अर्जेन्टिनाले स्विट्जरल्यान्डविरुद्ध १-० को अग्रता बनाएको थियो। खेलको दोस्रो हाफको ६७ मिनेटमा स्विट्जरल्यान्डका आर.रोड्रिगेजले अर्जेन्टिनाविरुद्ध बराबरी गोल फर्काएका थिए। खेलको १०औँ मिनेटमा एलेक्सिस म्याक एलिस्टरको गोलमा अर्जेन्टिनाले अग्रता लिएको थियो। कप्तान लियोनल मेसीले कर्नर मार्फत् प्रहार गरेको बललाई २० नम्बर जर्सीका एलेक्सिस म्याक एलिस्टरले हेडमार्फत् उत्कृष्ठ गोल गरेका थिए। आजै बिहान भएको क्वार्टरफाइन खेलमा नर्वेलाई २-१ ले पराजित गर्दै इंग्ल्यान्ड सेमिफाइनलमा प्रवेश गरेको छ। ७२ वर्षपछि क्वार्टरफाइनलमा पुगेको स्वीटजरल्यान्ड भने अन्तिम ८ बाट नै बाहिरिएकाे छ।
काठमाडौं । विश्वकपमा पहिलोपटक सहभागी भएको केप भर्डले साउदी अरेबियासँग गोलरहित बराबरी खेल्दै आफ्नो ऐतिहासिक यात्रा जारी राखेको छ । शुक्रबार ह्युस्टनमा भएको खेलमा ०–० को बराबरीसँगै स्पेनले उरुग्वेमाथि १–० को जित निकाल्दा समूह ‘एच’बाट केप भर्ड उपविजेताका रूपमा नकआउट चरणमा प्रवेश गर्न सफल भयो । विश्वकपअघि फिफा वरीयताको ६७औँ स्थानमा रहेको करिब पाँच लाख जनसंख्या भएको अफ्रिकी द्वीपीय राष्ट्र केप भर्डले समूह चरणका तीनवटै खेलमा अपराजित रहँदै अन्तिम ३२ मा स्थान बनाएको हो। अब उसले जुलाई ३ मा मियामीमा साविक विजेता अर्जेन्टिनासँग प्रतिस्पर्धा गर्नेछ । समूह ‘एच’मा स्पेन सात अंकसहित समूह विजेता बन्यो भने केप भर्डले तीन अंक जोड्दै दोस्रो स्थान सुरक्षित गर्यो । उरुग्वे र साउदी अरेबिया समान दुई–दुई अंकमै सीमित हुँदै प्रतियोगिताबाट बाहिरिए । स्पेनले अन्तिम ३२ मा समूह ‘जे’को उपविजेता टोली अल्जेरिया वा अस्ट्रियामध्ये एकसँग खेल्नेछ । इतिहास रच्ने लक्ष्यसहित मैदान उत्रिएको केप भर्डका प्रशिक्षक बुबिस्टाले टोलीमा पाँच परिवर्तन गरेका थिए । केही परिवर्तन बाध्यात्मक भए पनि अनुभवी गोलरक्षक भोजिन्हालाई भने टोलीमा निरन्तरता दिएका थिए । ४० वर्षीय भोजिन्हाले प्रतियोगिताभर उत्कृष्ट प्रदर्शन गर्दै टोलीलाई कठिन परिस्थितिबाट जोगाएका छन् । उनले पहिलो खेलमा युरोपियन च्याम्पियन स्पेनसँग ०–० को बराबरी गराउन महत्वपूर्ण भूमिका खेलेका थिए । त्यसपछि दुई पटकको विश्वकप विजेता उरुग्वेसँग २–२ को साहसिक बराबरी खेलेपछि केप भर्डको नकआउट सम्भावना बलियो बनेको थियो । साउदी अरेबियाविरुद्धको खेलमा पहिलो हाफमा केप भर्ड केही हदसम्म हावी देखिएको थियो । खेलको ३३औँ मिनेटमा अनुभवी डिफेन्डर हसन अल–तम्बक्ती घाइते हुँदै स्ट्रेचरमार्फत मैदानबाट बाहिरिएपछि साउदी टोलीलाई ठूलो धक्का लागेको थियो । केप भर्डका विली सेमेडोको प्रहार पोस्टबाट थोरैले बाहिरियो भने दुवै टोलीले पहिलो हाफमा स्पष्ट गोलको अवसर सिर्जना गर्न सकेनन् । त्यसबेला उरुग्वेलाई पछि पार्दै केप भर्डे नकआउटतर्फ अग्रसर थियो । दोस्रो हाफ सुरु भएको तीन मिनेटमै जामिरो मोन्टेइरोले नजिकबाट उत्कृष्ट अवसर पाए पनि कमजोर फिनिसिङका कारण गोल गर्न सकेनन् । त्यसपछि केभिन पिनाको लामो दूरीको प्रहार पनि लक्ष्यभन्दा थोरैले बाहिरियो ।
फिफा विश्वकप २०२६ मा उपाधि दाबेदार ब्राजिलले लगातार दोेस्रो जित निकालेको छ। तेस्रो जित निकाल्नेक्रमा उसले बिहीबार स्कटल्याण्डलाई ३–० ले हरायो। ब्राजिलले पहिलो खेलम मोरक्कोसँग १–१ को बराबरीमा खेल्दा दोस्रो म्याचमा हाइटीलाई ३–० ले हराएको थियो। तेस्रो खेलमा पनि ब्राजिलको जितमा भिनिसियस जुनियर नायक बने। उनी एक्लैले २ गोल गरे। यस्तै, म्याथियस कुन्हाको नाममा एक गोल रह्यो। आजको खेलसँगै ब्राजिल अपराजित रहेर नकटआउट चरणमा प्रवेश गरेको छ।
पोखरा कलेज अफ म्यानेज्मेण्टद्वारा आयोजित प्रथम अन्तर कलेज टिचर्स फुटसल प्रतियोगितामा न्यू ग्यालेक्सी च्याम्पियन बनेको छ । फिष्टेल एकेडेमीलाई ३–१ गोलले पराजित गर्दै न्यू ग्यालेक्सिले उपाधि जितेको हो । यसअघि सेमिफाइनलमा ग्यालेक्सिले आयोजक पिसिएमलाई ३–२ गोलले तथा फिष्टेल एकेडेमीले शितलादेवीलाई ३–२ गोलले पराजित गर्दै फाइनलमा स्थान बनाएको थियो । विजेता तथा उप–बिजेता टिमले नगदसहित मेडल पुरस्कार प्राप्त गरे । पोखरा कलेज अफ म्यानेज्मेण्टका प्राचार्य लिना नेगी श्रेष्ठले विजयी खेलाडीहरुलाई पुरस्कृत गरिन् । यसअघि कलेजले प्लस टु को परिक्षा दिएर बसेका विद्यार्थीहरुका लागि फुटवल, बास्केटबल लगायतका प्रतियोगिताहरु आयोजना गरेको थियो ।
पोखरा —चङ्गा प्रोडक्सनको आयोजनामा पोखरा रङ्गशालाको कभर्ड हलमा सम्पन्न ‘चङ्गा अल–स्टार फुटसल २०२६’ प्रतियोगितामा टिम प्याराडाइम च्याम्पियन बनेको छ । फाइनल खेलमा टिम क्रियटरलाई २–० गोल अन्तरले पराजित गर्दै प्याराडाइम च्याम्पियन बनेको हो । प्याराडाइमको जीतमा खेमे र मिस्टर फुडीले समान १/१ गोलको योगदान दिए । सो प्रतियोगितामा सर्वाेत्कृष्ट खेलाडीका रुपमा सोही टिमकै विवश पुरस्कृत भए । यस्तै सर्वाधिक गोलकर्ताका रुपमा खेमे घोषित भए । प्रतियोगिताबाट विजेता तथा उपविजेता बनेको टोलीले शिल्ड तथा मेडल प्राप्त गरे । हाल जारी फिफा फुटबल विश्वकपको अवसरमा आयोजित सो प्रतियोगितामा विभिन्न क्षेत्रका प्रतिष्ठित व्यक्तिहरू (कलाकार, कन्टेन्ट क्रियटर, व्यवसायी लगायत) आबद्ध ४ वटा टोलीले सहभागिता जनाएका थिए । सामाजिक सेवा र परोपकारी कार्यमा टेवा पु¥याउने लक्ष्यसहित प्रतियोगिता आयोजना गरिएको चङ्गा प्रोडक्सनका प्रोग्राम कोर्डिनेटर तथा म्यानेजर सुजल केसीले बताए । चंगा प्रोडक्सन मोफलसलकै लोकप्रिय र चर्चित प्रोडक्सन कम्पनी हो । जसले ‘हावा जस्तै’ लगायतका दर्जनौ सफल म्यूजिक भिडियोहरु उत्पादन गरिसकेको छ ।
पोखरामा सम्पन्न दोस्रो संस्करणको स्व. बखतबहादुर मेमोरियल ३५ प्लस भेट्रान्स फुटसल प्रतियोगितामा आयोजक मेजर एफसी च्याम्पियन बनेको छ । पोखरा महानगरपालिका १३ स्थित खेलकुञ्जमा शनिबार भएको फाइनल खेलमा सविन मेमोरियललाई ३–१ गोल अन्तरले पराजित गर्दै आयोजक च्याम्पियन बनेको हो । च्याम्पियन बनेसँगै मेजर एफसीले नगद रु ९१ हजार, शिल्ड तथा मेडलसहित प्रमाणपत्र प्राप्त गर्याे । यस्तै उपविजेता बनेको सविन मेमोरियलले नगद रु ५१ हजार, शिल्ड तथा मेडलसहित प्रमाणपत्र हात पार्याे । सो प्रतियोगिताबाट सर्वाेत्कृष्टसँगै सर्वाधिक गोलकर्ताका रुपमा मेजर एफसीका भोला सिलवाल पुरस्कृत बने । यस्तै उत्कृष्ट गोलरक्षकका रुपमा सोही टिमकै दिव्यशक्ति गुरुङ घोषित भए । कुल १९ टिमको सहभागिता रहेको प्रतियोगितामा ए डिभिजन फुटबल खेलाडी जिवन गुरुङका धर्मपत्नी सरिता गुरुङको उपचारका लागि आर्थिक सहयोगसमेत संकलन गरिएको प्रतियोगिता संंयोजक दिपक गुरुङ (मेजर) ले जानकारी दिए । उनका अनुसार प्रतियोगिताका विजेता तथा उपविजेता टोलीका खेलाडीहरुलाई कास्की जिल्ला खेलकुद विकास समितिका अध्यक्ष मिलन गुरुङ, पूर्व राष्ट्रिय फुटबल खेलाडी इश्वर गुरुङ, समाजसेवी तथा पुरस्कारदाताहरु लगायतले पुरस्कार वितरण गरेका थिए ।
पोखरा । पोखरामा दोस्रो संस्करणको स्व. बखत बहादुर मेमोरियल ३५ प्लस भेट्रान्स फुटसल प्रतियोगिता सुरु भएको छ । मेजर एफसीको आयोजनामा पोखरा १३ स्थित खेलकुञ्जमा आजदेखि स्व. बखत बहादुर मेमोरियल ३५ प्लस फाइभ ए साइड फुटसल प्रतियोगिता सुरु भएको हो । सो प्रतियोगिताको उद्घाटन कास्की जिल्ला खेलकुद विकास समितिका अध्यक्ष मिलन गुरुङले गरे । सो अवसरमा बोल्दै उनले सो प्रतियोगिताले खेकलुद क्षेत्रलाई चलायमान बनाउन सहयोग पुर्याउने धारणा राखे । उनले विगतका स्तरीय खेलाडीहरुबीचको आपसी भाइचारालाई मजबुद गर्न सो प्रतियोतिाले महत्वपूर्ण भूमिका खेल्ने बताए । प्रतियोगिताको उद्घाटन खेलमा हेम्जा युनाइटेमाथी ८–३ गोल अन्तरले सहज जीत निकाल्दै गण्डकी स्पोर्टस् क्लब विजयी बनेको छ । यसजीतसँगै गण्डकी स्पोर्टस क्लब दोस्रो चरणमा प्रवेश गरेको प्रतियोगिता संयोजक दीपक गुरुङ (मेजर) ले बताए । उनका अनुसार दोस्रो खेलमा एक्टिभ स्क्वार्डले न्यू एयरपोर्टलाई ७–२ गोल अन्तरले पराजित गर्याे । यस्तै तेस्रो खेलमा नरेन एफसी टिम ए ले कस्केरी एफसीलाई पेनाल्टी सुटआउटमा ४–३ गोल अन्तरले पराजित गर्दै नरेन एफसी दोस्रो चरणमा प्रवेश गरेको संयोजक गुरुङले बताए । उनका अनुसार आज प्रिक्वाटरफाइनलका सबै खेलहरु सम्पन्न हुनेछन् । कुल १९ टिमको सहभागिता रहेको सो प्रतियोगिताको विजेता टिमले नगद रु ९१ हजारसहित शिल्ड, मेडल तथा प्रमाणपत्र प्राप्त गर्नेछ । यस्तै उपविजेता टोलीलाई नगद रु ५१ हजारसहित शिल्ड, मेडल तथा प्रमाणपत्र प्रदान गरिने संयोजक गुरुङले बताए । प्रतियोगितामा विधागततर्फ सर्वाेत्कृष्ट खेलाडी, उत्कृष्ट गोलरक्षक र सर्वाधिक गोलकर्तालाई आकर्षक पुरस्कारको समेत व्यवस्था गरिएको छ । सोही प्रतियोगितामार्फत ए डिभिजन फुटबल खेलाडी जिवन गुरुङका धर्मपत्नी सरिता गुरुङको उपचारका लागि आर्थिक सहयोगसमेत संकलन गरिएको छ ।
पोखरा । कास्की जिल्ला टेनिस संघको आयोजनामा शनिबारदेखि पोखरामा ‘पाँचौँ मनुश्री/भिग्नजित राष्ट्रिय जुनियर टेनिस प्रतियोगिता–२०८३’ सञ्चालन हुने भएको छ । पर्यटकीय नगरी पोखरालाई खेल पर्यटन (स्पोट्र्स टुरिजम) को माध्यमबाट विश्वसामु चिनाउने उद्देश्यले संघले यो प्रतियोगितालाई निरन्तरता दिइएको शुक्रबार आयोजित पत्रकार सम्मेलनमार्फत जानकारी दिएको हो । पोखरा रंगशालास्थित टेनिस कोर्टमा वैशाख ५ गतेदेखि ८ गतेसम्म चल्ने उक्त प्रतियोगितामा विभिन्न १६ वटा इभेन्टहरू समावेश गरिएको संयोजक लोक बहादुर गुरुङले जानकारी दिए । उनका अनुसार यू–८, यू–९, यू–१०, यू–१२, यू–१४, यू–१६ र यू–१८ उमेर समूहका ब्वाइज तथा गल्र्स सिंगल्सका साथै ओपन ब्वाइज तथा गल्र्स डबल्स विधामा प्रतिस्पर्धा हुनेछ । प्रतियोगितामा देशभरबाट ८० भन्दा बढी खेलाडीहरुको सहभागिता रहने संयोजक गुरुङले बताए । प्रतियोगिताका विजेता तथा उपविजेता खेलाडीहरूले आकर्षक गिफ्ट ह्याम्पर, सर्टिफिकेट र मेडल प्राप्त गर्ने संयोजक गुरुङले बताए । प्रतियोगिताले उदीयमान खेलाडीहरूको हौसला बढाउनुका साथै पोखराको पर्यटन प्रवद्र्धनमा समेत टेवा पुग्ने उनले बताए । प्रतियोगिताका मुख्य प्रायोजक तथा संरक्षक एवं खेलप्रेमी कुमार श्री मोहन बहादुर शाही रहेका छन् । उनले आफ्ना नाति–नातिनीको सम्मान स्वरूप यो प्रतियोगितालाई मुख्य प्रायोजन गर्दै आएका छन् । कास्की जिल्ला टेनिस संघले लामो समयदेखि पोखरामा राष्ट्रिय तथा अन्तर्राष्ट्रिय स्तरका टेनिस प्रतियोगिताहरू आयोजना गर्दै आइरहेको छ ।