कतै यात्रा गर्दै हुनुहुन्छ भने सवारीसाधनका विभिन्न भागमा लेखिएको गजल र सायरी त पक्कै पढ्नु भएको होला । चालकको जीवनदेखि राजनीति र प्रेमदेखि बिछोडसम्म समेटिएका केही हरफले यात्राको दौरान रमाइलोमात्र हैन सोचनीय पनि बनाउँछ ।    कतिपय गजल र सायरी अपाच्य र अश्लील पनि लाग्न सक्छ । त्यस्तै दोहोरो अर्थ लाग्ने रचना पनि प्रशस्तै भेटिन्छन् । यस्तै ठानेर होला, आजदेखि उपत्यका ट्राफिक प्रहरी कार्यालयले सवारीसाधनमा लेखिएका गजल, सायरी, मुक्तक हटाउने अभियान सुरु गरेको छ ।    कार्यालयले दिएको जानकारी अनुसार सवारी साधनमा लेखिएको अश्लिल, अपाच्य, गाली, कानून विपरित तथा सामाजमा विकृत्ति ल्याउने खालका साहित्यिक सायरी, कविता, गजल तथा विभिन्न भनाई लेखहरूलाई हटाउने वा मेटन लगाउने अभियान सञ्चालन गरिएको छ ।    यस्ता रचनाले चालकको ध्यान मोडिएर दुर्घटना हुने पाइएकाले भन्दै त्यस्ता पेन्टिङ् र स्टिकर हटाउन थालिएको हो ।    नेपालको कानून विपरीत महिला, बालबालिका, सिमान्तकृत समूदायलाई अपमान र अवहेलना गर्ने गरी कुनै पनि लेख रचना कविता सायरी वा कुनै पनि प्रकारका सामग्री प्रचार प्रसार गर्न वा लेख्न नपाईने भएकोले यसलाई अभियानकै रुपमा सञ्चालनमा ल्याईएको काठमाडौँ उपत्यका ट्राफिक प्रहरी कार्यालयले जनाएको छ ।   प्रहरीका अनुसार अब गाडीको शिसामा स्टिकर वा प्रचारजन्य सामग्री टाँस्न पाइनेछैन । यसैगरी  चालक आसपास क्याबिनको भागमा सजावटका लागि झल्लरलगायतका सामाग्री तथा म्युजिक सिस्टम क्याबिनमा राख्न पनि निषेध गरेको छ ।

पोखराः गण्डकी प्रदेशका भौतिक पूर्वाधार, शहरी विकास तथा यातायात्रमन्त्री कुमार खड्काले आज पृथ्वीचोकस्थित बसपार्क क्षेत्रको अवलोकन गरेका छन् । अवलोकनकाक्रममा मन्त्री खड्काले  बसपार्कको नाली र ढलान निर्माणमा ७५ लाख रुपैयाँ खर्चेको बताए ।    वडा कार्यालयका पदाधिकारी र स्थानीयसँग गफिँदै मन्त्री खड्काले बसपार्कमा नाली र ढलानको काम प्रदेश सरकारले नै गर्ने बताए । ‘पहिले ७५ लाख बाट नाली र ढलानको काम सुरु गरेको तपाइहरुलाई थाहै छ’ खड्काले भने ‘यसपटक मैले ५ करोड रुपैयाँ छुट्याएर निर्माणलाई निरन्तरता दिनेछु ।’   बसपार्क निर्माणको काममा महानगरपालिका पनि अघि सरेको बताउँदै उनले प्रदेश सरकारलाई नै काम गर्न दिनुपर्ने धारणा राखे । ‘गण्डकी प्रदेश सरकारलाई नै काम गर्न दिनुहोस् उनले भने ‘नगरपालिकाले ५–१० लाख रुपैयाँ हाल्दा डुप्लिकेसन भयो ।’ सोही क्रममा उनले मंसिरमा पद गएपनि बहुवर्षे ठेक्का रोक्न नमिल्ने भन्दै बसपार्क बनाएरै छाड्न अठोट गरे ।    बसपार्कमा नाली र ढलान बनेपछि महानगरले क्रेडिट लिन खोजेको भन्दै उनले प्रदेश सरकारले नै निर्माण गर्ने बताएका छन् । एउटै ठाउँमा वडाले, महानगरले, प्रदेशले र संघले पनि गर्दा भ्रष्टाचार हुन्छ भन्दै उनले महानगरले गर्ने हो भने अन्तै काम गरोस् भनि धारणा राखे ।   नाली र ढलानको काम गर्दा महानगर, वडा, अन्य संस्था आएर ५ लाख रुपैयाँ हाल्दै क्रेडिट लिन खोज्ने परिपाटी हावी हुनसक्नेतर्फ उनले चिन्ता व्यक्त गरे ।    यही साउन, भदौदेखि थप नाली निर्माण  ढलानको काम सुरु गर्ने बताउँदै उनले महानगर र संघले बसपार्क निर्माणको प्रक्रियालाई अघि बढाउनुपर्ने उल्लेख गरे । ‘महानगर ५–१० लाख रुपैयाँ छुट्याएर ढलानको काममा मिसिन आउने हैन’ व्यंग्यात्मक शैलीमा खड्काले भने ‘उहाँहरुले बसपार्कको टर्मिनल भवन, जग्गाको काम गर्नेतर्फ लाग्नुपर्छ ।’   बसपार्क निर्माणकालागि ४७ वर्ष पहिले जग्गा अधिग्रहण गरिएको हो । सुरुमा २ सय ५ रोपनी क्षेत्रफल रहेको जमिन अहिले अनुमानित ८१ रोपनीमा सिमित भएको छ । बसपार्क क्षेत्रमा करिब ५ सय सुकुम्बासीले जमिन ओगटेर बसेका छन् भने केही व्यापारीसमेत रहेका छन् ।    जेठको अन्तिम साता मन्त्री खड्का र पोखरा महानगरका मेयर धनराज आचार्यले संयुक्तरुपमा नाली र ढल निर्माणको शिलान्यास गरेका थिए ।   

पोखरा:  पोखरा महानगरपालिकाका पूर्वमेयर मान बहादुर जिसीले पोखरा र पोखरेली जनताको हित विपरित कुनै पनि निर्णय र काम नगरेको बताएका छन् ।   उनले आज (बुधबार) प्रेस विज्ञप्ती जारी गर्दै नगर उपत्यका विकासको ६३ रोपनी जग्गा ३ निजी कम्पनीलाई गुपचुप भाडामा दिएको बारेमा जवाफिदैं उनले जनताको हित विपरित कुनै निर्णय र काम नगरेको बताएका हुन् ।     पूर्वमेयर जिसीद्वारा हस्ताक्षरित विज्ञप्तीमा भनिएको छ, ‘पोखरा उपत्यका नगर विकास समितिको जग्गा भाडामा लगाइएको बारेमा सञ्चार माध्यममा प्रकाशित समाचारप्रति मेरो गम्भीर ध्यानाकर्षण भएको छ । देशमा संघीय शासन प्रणाली लागु भएपछि पोखरा महानगर नै उपत्यका नगर विकास समितिको अध्यक्ष हुने प्रावधान अनुसार नै उक्त समितिको अध्यक्षको जिम्मेवारी सम्हालेको  यहाँहरुलाई अवगत नै छ । पोखरा महानगरको प्रमुख र समितिको अध्यक्ष हुदाँ पोखरा र पोखरेली जनताको अहित हुने गरि कुनै निर्णय र काम गरेको छैन । यो अवधिमा भएका कामहरुको पोखरेली जनताले मुल्याङकन गर्नुभएकै छ । र अब पनि गर्नुहुनेछ ।    पोखरा उपत्यका नगर विकास समितिको स्वामित्वमा रहेको राष्ट्र बैंकचोकस्थित पर्यटक बसपार्कको जग्गा, गल्फ कोर्सको जग्गा र यातायात कार्यालय नजिकैको जग्गा सेटिङ मिलाएर भाडामा दिएको भन्ने आरोप निराधार छ । र कुनैपनि भ्रममा नपर्न पोखरेली जनतालाई आग्रह गर्दछु । पोखरा उपत्यका नगर विकास समितिको संस्थागत हितलाई नै ध्यानमा राखेर प्रचलित नियम कानून र विधि अनुसार नै जग्गा भाडामा लगाइएको हो ।      २०७४ मा जनप्रतिनिधि निर्वाचित भएर आउनुभन्दा अगाडी ठाडो तोक आदेशमा समितिको जग्गा भाडामा लगाउने प्रवृतिको अन्त्य गर्दै प्रचलित कानूनको अधिनमा रहि प्रतिस्पर्धाका आधारमा जस्ले बढि भाडा दिन कबुल गर्छ उसैलाई नै सर्तसहितको नियममा टेकेर जग्गा भाडामा लगाइएको तथ्य जानकारी गराउँदछ ।      विगतमा तोक आदेशमा सम्झौता गरेर भाडामा दिइएका समितिका स्वामित्वमा रहेका विभिन्न ठाउँका जग्गा र यी तिनवटा जग्गाको भाडापनि विगतमा कति थिए र अहिले कतिमा भाडामा लगाइएको हो ? सोको अध्ययन गरेर सत्य बाहिर ल्याउन सञ्चारमाध्यमलाई विनम्रतापूर्वक आग्रह गर्दछु ।   विगतको गलत प्रवृतिलाई निरुत्साहित गर्दै जग्गाको प्रचलित मुल्य अुनसार प्राविधिक र प्रशासनिक टिमले तयार पारेको रिपोर्टलाई आधार मानेर नै कानून र विधिसम्वद जग्गा भाडामा लगाइएको पुनः स्मरण गराउँदछु ।   संस्थालाई हानी हुने  र व्यक्तिलाई लाभ पुग्ने गरि पूर्वाग्राही भएर जग्गा भाडामा लगाउने मनसाय नराखिएको स्पष्ट पार्दै जग्गा भाडामा लगाउने प्रक्रियाको सुक्ष्म ढंगले छानबिन गरि कानूनी रुपमा त्रुटी देखिए तत्काल खारेज गर्ने अधिकार वर्तमान नेतृत्वलाई रहेको जानकारी गराउँदै निवर्तमान अध्यक्षको हैसियतले पूर्ण सहयोग रहने प्रतिवद्धता व्यक्त गर्दछु ।’     पूर्वमेयरले पर्यटक बसपार्कको १८ रोपनीसँगै, पोखरा ९ मा पर्ने ५ रोपनी जमिन राइजिङ कन्स्ट्रक्सनलाई मासिक १ लाख ३५ हजार रुपैयाँ भाडामा दिएका थिए । त्यस्तै, वडा १७ स्थित गल्फ ट्रेनिङ सेन्टर रहेको ४० रोपनी जमिन एक्सन बिल्डर्स प्रालिलाई मासिक २ लाख ७२ हजार र बसपार्कलाई मासिक २ लाख ७५ हजार रुपैयाँ भाडामा दिए थिए ।    जसमध्ये गल्फ कोर्सलाई २५ र अन्य दुई कम्पनीलाई १० वर्षकालागि दिइएको हो । कुनैपनि जमिन भाडामा लगाउन मेयर एक्लैको निर्णय काफी नहुने भएपनि यस विषयमा उनले एकलौटी र मनोमानी निर्णय गरेका थिए । सबै निर्णयमा पूर्वमेयर जिसीकोे हस्ताक्षर रहेको छ ।  

पोखरा:  पोखराको फेवातालको मुहान भनिने पामे क्षेत्रमा भएको प्लटिङको विषयमा आज राष्ट्रियसभामा चर्चा चलेको छ ।    सभाका सदस्य खिमलाल देवकोटाले तालको सिरानमै धमाधाम प्लटिङ् भएकोमा चिन्ता व्यक्त गर्दै यसले फेवाको आयु घटाउँदै लगको बताएका छन् । सोही प्रसंगमा देवकोटाले भने, ‘ मैले केटाकेटीमा देखेको फेवातालको आधा भाग अतिक्रमित छ । भूमाफिया र दलालहरुको चंगुलमा छ । फेवातालको पानीको स्रोत र मुहान हर्पनखोला माथिको मानवीय दमन र हिंसा झन् कहालीलाग्दो छ ।’   फेवासँग बाल्यकालीन सम्झनालाई उजागर गर्दै उनले पामेबजारसम्म फेवाताल फैलिएको सुनाए । ‘ढुंगा, गिट्टी, बालुवालगायतका नाममा यसको निरन्तर दोहन भइरहेको छ’ उनले भने ‘दोहन लगायतका कारण फेवाताल निरन्तर पुरिँदैछ । पानीका स्रोतहरु मेटिँदैछन् ।’   ताल संरक्षणमा प्रमुख भूमिका खेल्नुपर्ने पोखरा महानगरपालिकाले नै फेवाको अस्मितामाथि खेलवाड गरेको देवकोटाको आरोप छ । फेवातालको मापदण्ड साविक ६५ मिटर नै कायम राख्न सर्वाेच्च अदालतले अन्तरिम आदेश दिएपनि महानगरपालिकाले खुट्टा कमाएको उनले टिप्पणी गरे ।    त्यस्तै, जिल्ला विकास समिति कास्कीका पूर्वसभापति पूण्यप्रसाद पौडेलको संयोजकत्वमा फेवाताल संरक्षण लगायतका लागि प्रतिवेदन पेस गर्न गठित समितिको २०७८ भदौ २८ को प्रतिवेदन सार्वजनिक गर्न समेत उनले माग गरेका छन् ।    सभामा भावुक शैलीमा प्रस्तुत भएका देवकोटाले सिमसार क्षेत्रमा कंक्रिटको जंगल बढ्दै गरेको, पानीको मुहान छेकेर प्लटिङ गरेको भन्दै यसलाई तत्काल नरोके फेवातालको आयु शताब्दी हाराहारीमा भएको उल्लेख गरे ।    ‘फेवातालको गरिमा बचाउन सरकारी संयन्त्रहरु संवेदनशील भएनन् । यसको अस्मितामाथि नै चारैतिरबाट लुट भइरहँदा टुलुटुल हेरेर बसे’ देवकोटाको भनाई छ ।

पोखराः गत जेठ ५ गत कार्यकाल सकाएर पोखरा महानगरपालिकाबाट बाहिरिनु अगावै पूर्वमेयर मानबहादुर जिसीले गरेको कर्तुत ४७ दिनपछि सार्वजनिक भएको छ ।    पदावधि सकिनु २ दिन अघि जेठ ३ गते पूर्वमेयर जिसीले पोखरा उपत्यका नगर विकास समितिको स्वामित्वमा रहेको करिब ६३ रोपनी जमिन ३ कम्पनीलाई दिने एकल निर्णय गरेको सार्वजनिक भएको छ । जमिन भाडामा लगाएकोमध्ये पर्यटन बसपार्कमा पर्यटकले सेवा लिन नपाएपछि केही गडबड भएको आशंकामा पर्यटन व्यवसायीहरुले पोखरा महानगरका मेयर धनराज आचार्यलाई जानकारी गराएपछि अन्य जमिनसमेत भाडामा लगाएको पाइएको छ ।    पूर्वमेयरले बसपार्ककाे १८ राेपनीसँगै, पोखरा ९ मा पर्ने ५ रोपनी जमिन राइजिङ कन्स्ट्रक्सनलाई मासिक १ लाख ३५ हजार रुपैयाँ भाडामा दिएका छन् । त्यस्तै, वडा १७ स्थित गल्फ ट्रेनिङ सेन्टर रहेको ४० रोपनी जमिन एक्सन बिल्डर्स प्रालिलाई मासिक २ लाख ७२ हजार र बसपार्कलाई मासिक २ लाख ७५ हजार रुपैयाँ भाडामा दिएका छन् ।    जसमध्ये गल्फ कोर्षलाई २५ र अन्य दुई कम्पनीलाई १० वर्षकालागि दिइएको हो । कुनैपनि जमिन भाडामा लगाउन मेयर एक्लैको निर्णय काफी नहुने भएपनि यस विषयमा उनले एकलौटी र मनोमानी निर्णय गरेका हुन् । सबै निर्णयमा पूर्वमेयर जिसीकोे हस्ताक्षर रहेको छ ।    यस विषयमा जानकार हुनुपर्ने व्यक्ति हुन् प्रमुख प्रशासकीय अधिकृत बलराम रिज्याल । उनैलाई यस विषयमा थाहा नभएपछि अहिले उनी पत्रकारको प्रश्न झेलिरहेका छन् । त्यसोत यो घटना हालै सञ्चारमाध्यममा आएपनि महानगरका केही कर्मचारीले भने असार १२ गते सुइँको पाएका थिए ।      सुनगाभाले पाएको सूचना अनुसार भाडामा लगाइएको ३ अलग जमिनको सम्झौता एकैदिन भएको हो । अझ, रोचक प्रश्न त यो छ कि पुर्वमेयरले नगर विकासको जमिन भाडामा लगाउँदा कुन ठाउँमा बसेर सम्झौता गरे ?      नियमतः कायालयमै बसेर सम्झौता गर्नुपर्ने बताइन्छ । तर मुलुकभर वैसाख ३० गते स्थानीय निर्वाचन सुरु भएको र त्यसपछि मतगणनाको प्रक्रिया अघि बढेको हो । तदनुसार उपत्यका नगर विकास समितिमा मतगणना कार्य भइरहेको थियो ।    यही बीचमा नगर विकासको कार्यालयमा सम्झौता नभएको ठहर गरिएको छ । कडा सुरक्षाकोबीच मत गणना भइँरहँदा बाहिरका मान्छेलाई प्रवेश सहज थिएन भने उक्त दिनहरुमा पूर्वमेयर त्यहाँ गएका पनि थिएनन् । यसकारण सम्झौता कार्यालय बाहिर निजी परिसरमा भएको पुष्टी हुने आधार मिलेको छ ।    साथै, सम्झौता हुने दिन जिसीले खाजा खर्चको शीर्षकमा ५० हजार रुपैयाँको बिलसमेत समावेश गरेको पाइएको छ । सोही बिललाई आधार मान्ने हो भनेपनि उक्त सम्झौता अज्ञातस्थलमा गरिएको हो ।    खारेज हुन्छः महानगरपालिका   पूर्वमेयर मानबहादुर जिसीले एकलौटी ढंगले गरेको जग्गा ठेक्का प्रकरण खारेज गरिने महानगरपालिका स्रोतले बताएको छ । जिसीले ठेक्का दिँदा प्रक्रिया नै नपु¥याएको भन्दै खारेजीको प्रक्रिया सुरु भइसकेको महानगरले जनाएको छ ।    ‘सिस्टम हुन्छ, समिति हुन्छ’ महानगर स्रोत भन्छ ‘मनोमानी र व्यक्तिगत तवरमा सरकारी सम्पत्ति ठेक्कामा लगाउँन पाइँदैन ।’ आज बसपार्क हस्तान्तरणपछि यस विषयमा टीम बनाएर छानबिन अघि बढाउने महानगरको योजना छ ।  उक्त सम्झौतापत्रसँग सम्बन्धित हालसम्म प्राप्त कागजात अनुसार ठेकेदार कम्पनीसँग धरौटी रकमसमेत नलिइएको पाइएको छ ।    त्यस्तै, उक्त बोलपत्र आव्हान गरिएको विज्ञापन नियमित प्रकाशन रोकिएको आदर्श नेपाल दैनिकमा गरिएको थियो । त्यसदिनको ३ प्रति महानगरमा रहेको छ भने विज्ञापन शूल्कको नाममा अनुमानित ८ हजार रुपैयाँ बुझाइएको जानकारी प्राप्त भएको छ । 

पोखराः पोखरामा हालै एक साहित्यकारले प्राप्त गरेको दर्जन हाराहारीको पुरस्कार एवं सम्मानलाई लिएर गण्डकी प्रज्ञा प्रतिष्ठानका कूलपति सूर्य खड्का बिखर्ची आलोचित भएका छन् ।    प्रसंग हो, गत शनिबार आयोजित देशभक्तसिंह कुँवरलाई गरिएको सम्मान कार्यक्रम । आफुलाई अलौकिक कवि भनेर चिनाउने कुँवरलाई एक दर्जन संस्थाले ५० हजारका दरले ६ लाख रुपैयाँको नगदसहित सम्मान गरे ।    उक्त सम्मान कार्यक्रममा १ दर्जन नै प्रमुख अतिथि रहेका थिए । जसमध्ये एक अतिथि हुन् प्रज्ञा प्रतिष्ठानका कूलपति बिखर्ची । सुन्दै विशेष र महान लाग्ने उपाधिबाट सुशोभित गराइएका कुँवर र उनकाबारे जिज्ञासा राख्दा कूलपति बिखर्चीले साहित्यकार केही भावुक हुने भन्दै कुँवरलाई साथ समर्थन गरे भोली देशकै ठूला साहित्यकार हुनसक्ने टिप्पणी गरे ।    ‘महाकवि देवकोटालाई पनि पहिले पागल भनिएको थियो’ बिखर्चीले भने ‘भोली उनी पनि त्यस्तै नहोलान् भन्न सकिन्न नी !’ यद्यपि, सामान्य सम्मान कार्यक्रम भनेर निम्तो गरिएपछि कार्यक्रममा पुगेको र त्यहाँ पुगेपछि अद्भूत–अद्भूत विभुषण दिइएको उनले सुनाए ।    ‘उनको (देशभक्त) बुवा मेरा साथी पनि हुन्, त्यही भएर पनि कार्यक्रममा गएको हुँ’ बिखर्ची भन्छन् ‘साहित्कायरले नै बोलाएको कार्यक्रममा प्रतिष्ठानकोतर्फबाट नजाने कुरा पनि भएन ।’ कुँवरले १ सय ८ कृति रचना गरिसकेकाले उनमा केही खुबी भएको उनको भनाई छ ।   तर हालसम्म कुँवरको कुनैपनि रचना नपढेको जनाउँदै बिखर्चीले झण्डै मरेर बाँचेका हुनाले उनलाइ ‘अलौकिक कवि’ भनिएको प्रष्ट्याए ।  प्रतिष्ठानले ‘दुर्लभ महामानव’ भन्ने विभुषणलाई कसरी व्याख्या गर्छ ?’ भन्ने प्रश्नमा बिखर्ची भन्छन् ‘अब धेरै सोधखोज नगर्नुस् न, आइन्दा यस्तो कार्यक्रममा म जान्न ।’   सोही कार्यक्रममा कूलपति बिखर्ची अतिथिको हैसियतमा उपस्थिति भएको विषयमा सदस्य–सचिव मनकुमार श्रेष्ठले भने खरो टिप्पणी गरेका छन् । ‘पोखरा साहित्य र संगीतको उर्वरभूमि हो तर कूलपति जुन कार्यक्रममा प्रमुख अतिथिको हैसियतमा सहभागी हुनुभयो त्यसले प्रतिष्ठानको गरिमामाथि आँच आउने काम भयो ।’   कुनैपनि कार्यक्रममा कतैबाट निम्तो आए त्यसउपर छलफल गरेरमात्रै सहभागी हुने परम्परा राख्न आवश्यक भएको उनको बुझाई छ । ‘शनिबारको कार्यक्रम त गाइजात्रा नै भयो’ श्रेष्ठ भन्छन् ‘अतिथिको पनि दोष छैन होला, यस्ता कार्यक्रममा स्वयं आयोजकले पनि ध्यान पु¥याउनुपर्ने हो ।’   त्यसो त उक्त कार्यक्रममा पोखराका चर्चित र स्वनामधन्य व्यक्तिलाई अतिथि बनाएर आयोजक र पुरस्कृत व्यक्तिले वाहवाही लुट्न खोजेको श्रेष्ठको अनुमान छ । श्रेष्ठ भन्छन् ‘आयोजकको स्वार्थमा प्रतिष्ठानलाई बेच्न खोजियो, आइन्दा कूलपतिज्यूले पनि सामान्य हेक्का राख्नुप¥यो ।’     इन्याल्क नेपाल नामक संस्थाद्वारा आयोजित पुरस्कार एवं सम्मान कार्यक्रममा बिखर्चीसहित शिक्षावीद् जर्ज जोन, छन्दनायक माधव वियोगी, समीक्षक मदन भण्डारी, वरिष्ठ गायिका बाबा राणालगायत प्रमुख अतिथि रहेका थिए ।  सम्मान गर्ने संस्थाहरुमा इन्याल्क नेपाल (अंग्रेजी प्रौढ साक्षरता अभियान), इन्याल्क नेपाल काठमाडौं र पोखरा शाखा, उन्नतिशील वाङ्मय प्रतिष्ठान, बैदाम वाङ्मय प्रतिष्ठान, रुपांकन साहित्य परिवार, श्रीवृद्धि साहित्य परिवार, श्री ऐतिहासिक कुँवर तथा राणा सांस्कृतिक समाज पोखरा, सनलाइट मिडिया टे«निङ सेन्टर, कारवि फाइनान्सियल एजेन्सी काठमाडौं, काविन ग्राफिक्स डिजाइनिङ एण्ड सोलुसन र माछापुच्छे« नृत्य प्रशिक्षण तथा सांस्कृतिक परिवार रहेका छन् ।    कार्यक्रममा कुँवरलाई साहित्य सम्राट, वाङ्मय सम्राट, शब्द सम्राट, सिर्जना सम्राट, लेखक सम्राट, रचना सम्राट, महासाहित्यकार, बहुआयामिक व्यक्तित्व, संगीत मणिरत्न, दिव्य गायक, युग संचारमणि र दुर्लभ महामानव उपाधिबाट सम्मान गरिएको हो ।     जानकारहका अनुसार कुँवरलाई सम्मान गर्ने संस्था र पुरस्कारको राशीमा परिवारकै योगदान रहेको छ । कुँवर सम्मानित भएपछि सामाजिक सञ्जालमा विभिन्नखालको टिका–टिप्पणी गरिएका छन् ।   

सञ्चारकर्मबाट राजनीतितर्फ मोडिएका रवि लामिछानेले गत ७ गते घोषणा गरेको राष्ट्रिय स्वतन्त्र पार्टीको गण्डकी प्रदेश संयोजकमा डा. डीके (ढाकाकुमार) श्रेष्ठ चयन भएका छन् ।    चिकित्सकसँगै सामाजिक कार्यमा सक्रिय श्रेष्ठ चीनको डाली युनिभर्सिटीमा ६ वर्ष अध्ययन गरेर नेपाल फर्किएका हुन् । पश्चिमाञ्चल क्षेत्रीय अस्पतालको इमर्जेन्सी वार्ड सम्हालेका श्रेष्ठ हाल आफ्नै शुभबिहानी पोलिक्लिनिकमा व्यस्त छन् ।    ‘पश्चिमाञ्चल क्षेत्रीय अस्पतालमा कार्यरत रहँदा सुधारको काम गरेको हुँ’ श्रेष्ठले भने ‘तर देशको बेथितिविरुद्ध लाग्न राजनीतिमा लाग्नुपर्छ भन्ने लागिरहन्थ्यो ।’ नेपालमा रहँदासम्म राजनीतिमा खासै चासो नरहेपनि अध्ययनकाक्रममा चीन पुगेपछि देश बदल्ने माध्यम नै राजनीति भएको चेत खुलेको उनले सुनाए ।    ‘राजनीतिक प्लेटफर्मको आवश्यकता थियो, यसैबीच रविजीले पार्टी खोलेपछि म पनि आबद्ध भए’ उनले सुनाए । हाल श्रेष्ठ आफ्नै पोलिक्लिनिक, समाजसेवा र राजनीतिमा सक्रिय छन् ।    पार्टीले योग्य ठानेर प्रदेशको जिम्मेवारी दिएकोप्रति उनले एकैपटक अवसर र चुनौति पाएको भनि टिप्पणी गरे । ‘बाहिर बसेर धारे हात लगाएरमात्र हुँदैन, समुन्नत नेपाल चाहनेले राजनीतिमा आउँनैपर्छ’ उनले प्रतिक्रिया जनाए ।    परिवर्तन नेपाल नामक संस्थाबाट समाजसेवामा सक्रिय श्रेष्ठले अब पार्टीसँग छलफल गरी छिट्टै प्रदेशस्तरीय कार्यक्रम गर्ने योजना रहेको उनले सुनाए । ‘देश बनाउने बाहेकको कुनै अर्काे स्वार्थ छैन, आउनुहोस् हातेमालो गरौं, हामी अघि बढौं र देशलाई अघि बढाऔं’ श्रेष्ठले भनेका छन् ।    हाल पार्टीमा २१ सदस्य रहेका छन् । जसमध्ये लामिछाने सभापति, मुकुल ढकाल प्रवक्ता र अन्य सदस्य रहेका छन् । 

पोखरा: पोखरा महानगरपालिकाका प्रमुख धनराज आचार्यले पोखरा उपत्यका नगरविकास समिति अध्यक्षको पदभार ग्रहण गर्दै महिना दिनभित्र समितिको स्वामित्वमा रहेको जग्गा खोजी गर्ने बताएका छन् ।    आफुले तोकेको समयसीमाभित्र नगरविकास समितिको नाममा कति जमिन कस्तो अवस्थामा छ भनेर सार्वजनिक गर्ने मेयर आचार्यको प्रतिबद्धता छ ।    ‘पोखरामा पोखरा उपत्यका नगरविकास समितिसँग प्रसस्त जग्गा छ । तर, के कति छ भन्ने लेखाजोखा नै राखिएको छैन’ आचार्यले भने ‘संरक्षणमा समेत ध्यान दिइएको छैन भन्ने आम नगरवासीलाई परेको छ । आफ्नो सम्पत्ति संरक्षण गर्न सकेन भन्ने परेको छ ।’   यसैबीच जिल्ला अदालत कास्कीको फैसला अनुरुप उपत्यका नगरविकास समितिको ठहर्ने फैसलाबाट प्राप्त जमिन सार्वजनिक हितका लागि प्रयोग गर्न खाली गराउने बैठकले निर्णय गरेको छ ।    त्यसका लागि ३५ दिने सूचना निकाल्ने र सम्याउने निर्णय भएको हो । साथै उक्त जग्गा प्राप्त गर्न नगरविकास समितिको तर्फबाट मुद्धा दायर गर्ने र बहस गर्ने सबैप्रति बैठकले आभार प्रकट गरेको छ ।   

पाेखराः असार १ गते गण्डकी प्रदेशको बजेट सार्वजनिक गरेपछि गठबन्धनबाटै आलोचित भएका अर्थमन्त्री रामजी बराललाई मन्त्रीबाटै हटाउने योजना बनाइएपनि अहिले उक्त संकट टरेको छ ।    बजेटमा मन्त्रीपरिषद्बाट पारित भएको योजनामात्रै हैन मुख्यमन्त्रीको योजनासमेत बाइपास भएको भन्दै नेपाली कांग्रेसबाट विरोध भइरहेको छ । त्यस्तै, प्रतिपक्ष दल नेकपा एमालेले पत्रकार सम्मेलननै गरेर प्रदेश सरकारले हालसम्म पनि बजेटबारे छलफल नचलाएकोमा रोष प्रकट गरेको छ ।    बजेटकै विषयमा खेलकुद मन्त्री राजीव गुरुङले अर्थमन्त्री बराललाई बेइमानीको संज्ञासमेत दिए । गठबन्धनका सहयात्रीमात्र नभएर आफ्नै पार्टीबाट पनि मन्त्री बरालमाथि आलोचना भएको छ ।    मन्त्रीपरिषद्बाट पारित भएको बजेटको साटो आफ्नो गोजीबाट बजेट प्रस्तुत भएको भनि मुख्यमन्त्रीले टिप्पणी गरेपछि कांग्रेस र माओवादीबीच बिग्रिएको सम्बन्धले हाल प्रदेश सभाको बंठक डाक्ने माहौलसमेत बन्न सकेको छैन ।    यस्तै बिग्रदो परिस्थितिबीच सरकारले मन्त्री नै हेरफेर गर्ने तयारी थालेको सुइँको पाएपछि अर्थमन्त्रीले गल्ती स्वीकार्दै बजेटबारे पुनः गृहकार्य गर्ने बताएका छन् । मन्त्रालय स्रोतकाअनुसार अर्थमन्त्री फाल्ने सहमति भएपछि बरालले बजेटको समीक्षा गरेर मन्त्रीपरिषद्को सल्लाह अनुसार चल्न राजी भएका हुन् ।    माओवादीबाट पनि गठबन्धनको सरकार भएकाले ‘सबैको कुरा सुन्नुपर्ने’ भन्दै मन्त्री बराललाई हटाउन ग्रीन सिग्नल दिइएको थियो । तर बुधबार अर्थमन्त्री बरालले मन्त्रीपरिषद्बाट पारित बजेटलाई समेटेर सभामा छलफल चलाउन राजी भएका छन् ।    ‘उहाँ (अर्थमन्त्री) गठबन्धनको प्रमुख दलसँग मन्त्रीपरिषद्ले तयार पारेको योजना अनुसार बजेटलाई समेट्न तयार भएपछि हाललाई मन्त्रीमण्डल पूनःगठनको अध्याय सकिएको छ’ मन्त्रालय स्रोतले भनेको छ ।    स्रोतका अनुसार हिजो पनि अर्थमन्त्रीले अटेर गरेको भए आज मन्त्रीमण्डल हेरफेर हुने प्रबल सम्भावना थियो । हाललाई संकट टरेपछि गण्डकी सरकारले सकेसम्म आगामी आइतबार अन्यथा सोमबार बजेटबारे छलफल गर्न प्रदेश सभा डाक्ने भएको छ ।    बजेट सार्वजनिक गरेलगत्तै मुख्यमन्त्रीले बराललाई डाकेर स्पष्टीकरण सोधेका थिए । त्यतिबेला पनि बरालले माफी मागेको बताइएको छ ।    अर्थमन्त्री बरालले असार १ गते आर्थिक वर्ष ०७९/८० को लागि ३५ अर्ब ९० करोड ९० लाख रुपैयाँको बजेट सार्वजनिक गरेका थिए ।