पोखरा: पोखरा बजारभित्र १३ वर्ष बढी सवारी चलाएका दलबहादुर विश्वकर्मा उमेरले दुई बिसे ४ पुगे । १० वर्ष आफ्नै ट्यासी चलाएका विश्वकर्माले पछिल्लो तीनवर्षयता मालिलको नगर माइक्रो हाँक्छन् । पोखराको विभिन्न रुटमा सवारी चलाएका दलबहादुर अहिले हरिचोक–छोरेपाटन, हरिचोक गण्डकी अस्पताल ओहोरदोहोर गर्छन् । उनी कति किलोमिटर कुदे भन्ने आफैलाई हेक्का छैन । यो उनको रुटिङ नै हो । उनी गुड्ने रुट भूपी शेरचन राजमार्गको हरिचोक–जिरो किमी सडकखण्ड हो । सवारी साधनको गति तिब्र नभएपनि कहिलेकाँही माइक्रोबसहरुको बीचमा कडा प्रतिस्पर्धा हुन्छ । त्यसैले कहिले सवारी हुइकाउनै पर्ने बाध्यता रहने दलबहादुर बताउछन् । दिनहुँ गुड्ने सडकमै पर्ने पोखरा महानगरपालिका ४ र ५ जोड्ने फिर्केपुल देखेर आजित छन् । अन्यत्र ४ लेनको भएपनि उक्त पुल २ लेनको भएकाले अत्याधिक दुर्घटना हुदै आएको उनको बुझाई छ । उनलाई फिर्के पुल कहिले बन्ला भन्ने पिरलो छ । ‘अचेल त यात्रुपनि आजित भइसकेछन्, दलबहादुर सुनगाभा न्यूजसँग गफिन्छन्, ‘जब फिर्के पुल आइपुग्छ त्यसपछि मलाई पो सोध्छन् गुरुजी यो फिर्केपुल कहिले बन्छ ह ?’ यो प्रश्नको जवाफ दलबहादुरले विगत केही वर्षदेखि खोजिरहेका छन्, तर उनीसँग थ्याक्कै जवाफ छैन । ‘म पनि तपाइहरु जस्तै त होनी । तपाइहरुलाई देशको स्थिती थाहा छदैछनी ।’ आफु जवाफिएको सुनाउछन् । आफ्नो साधनमा प्राय यात्रुहरु दोहोरीने उनले सुनाए । ‘एउटै रुट हिड्ने भएपछि प्राय जागिरेहरु दोहोरिनुहुन्छ । त्यही भएरपनि होला उहाँहरुको गुनासो पनि पुल अझै किन बनेन भन्ने हुन्छ, उनको प्रश्न छ, ‘होइन यो पुल नबनाउने कम्पनीलाई कारवाही नै हुदैन कि के हो ?’ पोखरा– बागलुङ सडक खण्डको जिरोदेखि हरिचोक खण्ड ६ लेनको बनेको वर्षौ भयो तर पोखरा ४ र ५ जोड्ने फिर्केपुल २ लेनमा सिमित हुँदा अत्याधिक जोखिम बढेको छ । एक्स्ट्राडोज्ड पुल बनाउने सम्झौता निर्माण कम्पन्नी (शान्ति आरोग्य जेभी सानेपा) ले सम्झौता अनुसार काम गरेको भएको फिर्केपुलमा एक्स्ट्राडोज्ड पुल २०७७/०७८ को चैत महिनामै सम्पन्न भइसक्थ्यो । तर विश्वव्यापी रुपमा फैलिएको कोरोना भाइरस र मुआब्जाको कारण देखाउँदै निर्माण कम्पनीले महामारीको समयमा काम रोकेको थियो । सडक डिभिजन कार्यालय पोखराका सूचना अधिकारी उञ्जल शर्माले निर्माण कम्पनीले सम्झौताको केही वर्ष मुआब्जाको कारण काम रोके पनि गएको असोजमा मुआब्जाको समस्या समाधान भइसकेको बताए । सडक डिभिजन कार्यालय पोखराले २०७५ असोज ८ गते शान्ति जेभी सानेपा ललितपुरसँग २०७७/०७८ को चैत ३० सम्म एक्स्ट्राडोज्ड पुल निर्माण गर्ने गरी सम्झौता गरेपनि पुल निर्माण हुन सकेन । विश्वभर फैलिएको कोरोना भाइरसका कारण निर्माण कम्पनीले काम नगरेको भन्दै मन्त्रीपरिषद्को बैठकले पूर्वाधारका काम एक वर्ष म्याद थप गर्ने निर्णय गरेको थियो । जसमा पोखरा फिर्केपुल निर्माण गर्न गत आर्थिक वर्षको २०७९/०८० को असार मसान्तसम्म काम म्याद थप भयो तर प्रगति ३० प्रतिशत मात्र देखियो थियो । सडक डिभिजन कार्यालय पोखराका सूचना अधिकारी शर्माले अहिले बर्षाको समय भएकाले पुल निर्माणको काम रोकिएको बताए । ‘सम्झौता गरेको मितिमा मुआब्जा र कोरोना भाइरसका कारण काम रोकियो, मन्त्री परिषद्को बैठकले नै पूर्वाधारको क्षेत्रतर्फ एकवर्षको म्याद थप्यो’, शर्माले भने, ‘म्याद थप भएको वर्ष दिन भित्र पनि काम सकिएन, काम गरे एक वर्षमा सकिन्छ तर निर्माण कम्पनीले काम नै गरेन ।’ ठेक्का तोडेर जाँदा लागत बढ्ने र काममा अझै ढिलासुस्ती हुन सक्ने शर्माले संकेत गरे । ‘तेस्रो पटक म्याद थप हुन सक्छ, ठेक्का तोडेर नयाँ प्रक्रियामा जाँदा त्यसको लागत बढेर जान्छ, पुल निर्माणमा थप ढिलाइ हुन नदिन तेस्रो पटक म्याद थप हुन सक्छ’, सूचना अधिकारी शर्माले भने । सडक डिभिजन कार्यालय पोखराका सूचना अधिकारी शर्माका अनुसार नेपालमै पहिलोपटक (पाइलको सपोर्टमा केवल हालेर टावर टाइपको) स्पेसल एक्स्ट्राडोज्ड मोटरेबल पुल निर्माण हुन लागेको हो । ‘पुरानो पुललाई यथावत राखेर त्यसको दायाँ र बायाँ २/२ लेनको २ वटा पुल निर्माण गर्न लागिएको हो, उनले भने, कंक्रिट ग्रिडर र पाइल फाउण्डेसन गरेर स्पेसल एक्स्ट्राडोज्ड मोटरेबल पुल बन्नेछ ।’ उनका अनुसार शान्ति आरोग्य जेभी सानेपा, ललितपुरले १२ करोड ३२ लाख २६ हजार १७६ रुपैयाँमा जिम्मा लिएको छ । सडक डिभिजन कार्यालय पोखराका ईन्जिनियर सहनशिला कायस्थले निर्माण कम्पनीले ३० प्रतिशत काम गरेको जानकारी दिइन् । ‘निर्माण कम्पनीले पुलको फाउण्डेशनको एकतर्फ सकेको छ, भौतिक प्रगतितर्फ ३० प्रतिशत काम सम्पन्न भएको छ’, कायस्थले भनिन्, ‘निर्माण कम्पनीले कोभिडका कारण काम नभएकाले सरकारले थपेको एकवर्षमा काम सकेन म्याद थप गर्न पत्र पठाएको छ म्याद थप भएर काम हुन्छ होला ।’ अहिले सञ्चालनमा नै रहेको पुलको दायाँ र बायाँ तर्फ बन्ने पुलको चौडाई ३/३ मिटरको हुनेछ । पुलको दायाँतर्फ निर्माण कम्पनीले काम सुरु गरेको छ भने बायाँतर्फ भने खानेपानी र सुकुम्बासी बस्तीको पनि समस्यासमेत देखिएको छ ।
काठमाण्डौ: भक्तपुर नगरपालिकाका प्रमुख सुनिल प्रजापतिले भक्तपुर नगरपालिकाले शिक्षा क्षेत्रमा गरेको लगानीबाट देश र समाजले उपलब्धि हासिल गरिरहेको बताउनुभएको छ । भक्तपुर नगरपालिकाले सञ्चालन गरेको ख्वप माध्यमिक विद्यालयको २५औँ वार्षिकोत्सवको अवसरमा भएको कार्यक्रममा उहाँले नगरपालिकाको लगानीबाट नगरभित्रका विद्यार्थीको साथै अरु क्षेत्रका विद्यार्थीले पनि फाइदा लिइरहेका बताउनुभयो । कार्यक्रममा भक्तपुर नगरपालिकाका उपप्रमुख एवम् विद्यालय सञ्चालक समितिका उपाध्यक्ष रजनी जोशीले भक्तपुर नगरपालिकाबाट सञ्चालित आठ वटा कलेजले भक्तपुरको मात्र नभइ सिङ्गो देश विकासको लागि महत्वपूर्ण योगदान पुर्याइरहेको बताउनुभयो । ख्वप इन्जिनियरिङ कलेजका प्राचार्य सुजन माकले भक्तपुर नगरपालिकाले ‘एक घर, एक स्नातक’ को अवधारणाका साथ स्थापना गरेको कलेजको उद्देश्य पूरा गर्दै गएको बताउनुभयो । कार्यक्रममा ख्वप कलेजका प्राचार्य प्रकाशकुमार श्रेष्ठले यस वर्ष कक्षा ११ मा एक हजार नौ सय सय २० जना भन्दा बढी विद्यार्थी भर्ना भएको जानकारी दिनुभयो ।
काठमाण्डौ: डेङ्गी नियन्त्रणका लागि सुनसरीको धरान उपमहानगरपालिका भित्रका सबै शैक्षिक संस्थाको पठनपाठन बन्द गर्ने निर्णय गरेको छ । कार्यपालिका बैठकले मंगलवार यस्तो निर्णय गरेको हो । धरान उपमहानगरपालिकाका मेयर हर्कराज साम्पाङले विद्यालयमा पठनपाठन बन्द गरी डेङ्गी नियन्त्रण अभियान चलाउने निर्णय गरेको जानकारी दिनुभयो । उपमहानगरले बिदाको बेला विद्यालयका शिक्षक, विद्यार्थीलाई डेङ्गी नियन्त्रणका लागि अभियानमा सहभागी गराउन आह्वान गरेको छ । बैठकले शिक्षक र विद्यार्थीसँगै सबै वडामा सामाजिक सङ्घसंस्था, टोल विकास समिति, स्थानीय समुदाय एकसाथ आ–आफ्नो वडाको टोलटोलमा खटिन पनि अनुरोध गरेको छ । डेङ्गी फैलाउने एडिज एजिप्टाई जातको लामखुट्टेको फुल पार्ने स्थान, लार्भा र प्युपा बन्ने स्थान पहिचान गरी नष्ट गर्ने अभियान चलाउन विद्यालय बन्द गरिएको धरान उपमहानगरपालिकाका प्रमुख प्रशासकीय अधिकृत मातृका भट्टराईले बताउनुभयो । वडा समिति कार्यालयले आ–आफ्नो वडामा निःशुल्क जाँच र औषधि वितरणका लागि स्वास्थ्य शिविर सञ्चालन गरे पनि लामखुट्टेको फुल, लार्भा र प्युपा नै नष्ट नगरेसम्म डेङ्गु नियन्त्रण हुने नदेखिएकले व्यापक जनपरिचालन गर्ने निर्णय गरिएको धरान–१५ का वडाध्यक्ष नरेशकुमार इवारामले बताउनुभयो । धरानमा डेङ्गीबाट जेठ तेस्रो हप्तायता एक बालिकासहित आठ जनाको ज्यान गइसकेको छ । निजी क्लिनिक, विपी कोइराला स्वास्थ्य विज्ञान प्रतिष्ठान आदिमा डेङ्गीका बिरामीले शय्या पाउन अहिले मुश्किल भएको छ ।
दमौली: तनहुँको व्यास नगरपालिकामा भरुवा बन्दुकले हानेर एकजनाले श्रीमतीको हत्या गरेका छन् । व्यास–५ मानुङका ५६ वर्षीय श्रीप्रसाद आलेले ४७ वर्षीया गीता आलेको हत्या गरेका हुन् । गए राति ११ बजे श्रीप्रसादले गीतालाई भरुवा बन्दुकले हानेर घाइते बनाएको र उनको दमौली अस्पतालमा मृत्यु भएको जिल्ला प्रहरी कार्यालयका प्रहरी नायब उपरीक्षक मोहनबहादुर खाँणले जानकारी दिनुभयो । श्रीप्रसादलाई प्रहरीले गए राति नै नियन्त्रणमा लिएको छ । घरायसी विवादका कारण उक्त घटना भएको प्रारम्भिक अनुसन्धानबाट खुलेको प्रहरीले जनाएको छ । घटनाबारे प्रहरीले अनुसन्धान थालेको छ ।
विराटनगर: कोशी प्रदेशको नयाँ मुख्यमन्त्रीमा नेपाली कांग्रेसका उद्धव थापाले नियुक्त भएका छन्। सभामुखको हस्ताक्षर प्रयोग गरी सरकार गठन गरेको कारण २२ दिनमै मुख्यमन्त्रीबाट बर्खास्त भएका थापालाई प्रदेश प्रमुख परशुराम खापुङले मंगलबार दोस्रो पटक मुख्यमन्त्री नियुक्त गरेका हुन्। यसअघि थापाले संविधानको १६८ को उपधारा २ अनुसार कांग्रेस, माओवादी केन्द्र, एकीकृत समाजवादी र जसपाको समर्थनमा मुख्यमन्त्री दाबी गरेका थिए। थापालाई मुख्यमन्त्री बनाउन कांग्रेसका २९, माओवादीका १३, एकीकृत समाजवादीका ४ र जसपाका १ सांसदले समर्थन गरेका छन्। यसअघि सभामुख बाबुराम गौतमले छुट्टै हस्ताक्षर गरेर थापाले मुख्यमन्त्रीको दाबी पेश गरेकोमा अहिले गौतमले सभामुखबाट राजीनामा दिइसकेकोले उनी माओवादी संसदीय दलका सदस्य कायम रहेकोले गठबन्धनसँग बहुमत अर्थात् ४७ सांसद छन्। गठबन्धनको सरकार बनाउन सभामुख गौतमले आजै पदबाट राजीनामा दिएका थिए ।
पोखरा: जिल्ला प्रहरी कार्यालयमा अनलाइनमार्फत ठगी गरेको भन्दै ४ सय २ वटा उजरी परेको छ । जिल्ला प्रहरी कार्यालय कास्कीले गत आर्थिक वर्ष २०७९/०८० मा भएको कार्यप्रगति सार्वजनिक गर्दै सामाजिक सञ्जालमार्फत विभिन्न चिठ्ठा परेको भन्दै ठगी गर्ने विरुद्ध ४ सय २ वटा उजरी परेको जानकारी दिइएको हो । जिल्ला प्रहरी कार्यालय कास्कीका सूचना अधिकारी तथा डिएसपी श्रवण कुमार बिकले अनलाइनमार्फत ४ करोड ३५ लाख बराबरको ठगी गरेको भन्दै उजुरी परेको बताए । ‘सामाजिक सञ्जा मार्फत विभिन्न व्यक्तिहरुलाई उपहार परेको भन्दै म्यासेज पठाउने र उपहार पाउन केही रकम पठाउनुपर्ने सर्त गिरोहले ठगी गर्ने गरेको पाइएको छ’ सूचना अधिकारीले भने, ‘अनलाइनमार्फत कास्कीमा ४ सय २ वटा उजुरी पर्दा ४ करोड ३५ लाख बढी ठगी गरेको पाइएको छ ।’ उनका अनुसार पीडितलाई ५७ लाख ५२ हजार ७ सय ७० रुपैयाँ फिर्ता गरिएको छ । थप अनुसन्धानकै क्रममा रहेको सूचना अधिकारी बिकले बताए । यस्तै उनका अनुसार सामाजिक सञ्जालमार्फत आइडी फेक बनाएर गाली बेइज्जत, अश्लिल वा अर्यादित कुराकानी गरेको भन्दै ४ सय १९ जनाले उजुरी दिएका छन् । कास्की प्रहरीमा गत आर्थिक वर्ष २ सय २६ जना महिला, १ सय ६६ जना पुरुष, २३ जना बालिका र ४ जना बालकले आइडी फेक बनाएर सामाजिक सञ्जाल मार्फत अमर्यादित कुराकानी गरेको भन्दै उजुरी दिइएको तथ्याङ्का उल्लेख छ । यस्तै कास्की प्रहरीले गत आर्थिक वर्ष विभिन्न स्थानबाट २ हजार २ सय ८६ वटा मोवाइल हराएको भन्दै उजरी परेको जानकारी दिएको छ । प्रहरीले उजुरीको आधारमा २ सय ८६ वटा मोवाईल फेला पारेर सम्बन्धित व्यक्तिलाई फिर्ता गरेको र बाँकी अनुसन्धानमा रहेको जनाएको छ । यस्तै कास्की प्रहरीले गत आर्थिक वर्ष बर्दीको दुरुपयोग गर्दै टिकटक बनाउने ८ जनासहित ४९ जना प्रहरीलाई कारवाही गरेको जनाएको छ ।
काठमाडौं: नेकपा (एकीकृत समाजवादी) पार्टीका अध्यक्ष माधवकुमार नेपालले इमानदारीबाट मात्रै देशले सफलता प्राप्त गर्ने बताउनुभएको छ। मङ्गलवार काठमाडौंमा आयोजित एक कार्यक्रमलाई सम्बोधन गर्दै उहाँले सबै नेताहरु बन्नुपर्ने जति इमानदार बन्न नसकेको बताउनुभएको हो। उहाँले देश बनाउने भावना जागृत भएमात्रै देश विकास हुने बताउनुभयो। उहाँले आफूलाई केन्द्रबिन्दुमा राखेर अघि बढ्न खोज्दा देशको विकास नभएको बताउनुभयो। नेपालले कुनै पनि कार्य गर्न इमानदारी मुख्य कुरा रहेको भन्दै सबै व्यक्ति आफूप्रति इमानदार हुनुपर्ने बताउनुभयो। नेपालले भन्नुभयो,ूजे सुकै गर्नका लागि पहिलो कुरा इमानदारी हो। आफूप्रति इमानदार हौं। आफ्नो पढाइप्रति इमानदार हौं। र, मिहिनेती बन्नुपर्छ। इमानदार र मेहनती भयो भने जस्तोसुकै क्षेत्रमा पनि सफल हुन सकिन्छ। अल्छी हुनुहुँदैन, ढाँट्नु हुँदैन, छलछाम गर्नु हुँदैन। हामी आफ्नो देश बनाउन सक्छौं कि सक्दैनौं भन्ने प्रश्न खडा भएको छ। हाम्रो स्वाधीनता र सम्मानमा ठेस लाग्ने काम भयो भने नेपालीलाई त्यो स्वीकार्य हुँदैन। जनताको सन्दर्भमा पनि जनतामा भेदभाव, अन्याय, अत्याचार भयो भने थिचोमिचो भयो भने अनि एउटाले अर्कोलाई विभिन्न हिसाबले गरिब भनेर हेला गर्ने, दलित भनेर हेला गर्ने, विपन्न भनेर हेला गर्ने यस्तो प्रवृत्ति भयो भने यो देशले प्रगति गर्न सक्दैन।’’ नेपालले संविधानमा अधिकारहरु थुप्रै दिए पनि लागू हुने कुरामा कमी देखिएको उहाँको भनाइ छ।
काठमाण्डौ: प्रतिनिधिसभाको आज मङ्गलवारको बैठक पनि सूचना टाँसेर स्थगित गरिएको छ । हिजो सोमवार पनि सूचना टाँस गरेर आज दिउँसो १ बजेका लागि बोलाइएको बैठक आज पुनः सूचना टाँस गर्दै स्थगन गरिएको संसद् सचिवालयले जनाएको छ । सभामुख देवराज घिमिरेले अर्को बैठक साउन २२ गते सोमवारका लागि तोक्नुभएको छ । सुन तस्करी प्रकरणमा प्रमुख प्रतिपक्षी दल नेकपा (एमाले) ले निरन्तर संसद् अवरोध गर्दै आएको छ । एमालेले गृहमन्त्री नारायणकाजी श्रेष्ठको राजीनामा र उच्चस्तरीय संसदीय छानबिन समिति गठनको माग गर्दै आएको छ ।
पोखरा: ‘जीवनमा सपना देख्नका लागि आँखा होइन, हिम्मत चाहिन्छ, आत्मबल चाहिन्छ ।’ सोमबार दिउँसो पामे फाँटको प्यारा ल्याण्डिङ जोनमा झरेपछि ब्लाइन्ड रक्सकी संस्थापक अध्यक्ष सृष्टि केसीले पत्रकारहरुमाझ आफ्नो साहस पस्किइन् । ‘आज एउटा सपना पुरा भएको छ । मैले बादल छोए र हिमाल देखे, फेवाताल नियाले,’ उनले थपिन् । सृष्टीसँग आँखा छन् तर त्यो आँखाले संसार देख्न छाडेको करिब १३ वर्ष बितिसकेको छ । सृष्टिलाई १६ वर्षको उमेरसम्म सेतो छडीको आवश्यक थिएन । पछि उनले आँखाको ज्योति गुमाइन् र दृष्टिबिहीन बनिन् । उनै सृष्टि ब्लाइन्ड रक्स नेपालको संस्थापक अध्यक्ष बनिन् । संस्थाको नेतृत्वको जिम्मेवारी पाएसँगै उनको एउटै धेय छ, फरक क्षमता भएका (दृष्टिबिहीन) हरु पनि अन्य अन्य नागरिक सरहनै अब्बल हुन्छन् भन्ने सन्देश दिने । त्यसैले उनलाई चुनौती सामना गर्न औधी मन पर्छ । विशेषगरी शाहसिक गतिविधिमा रुचि राख्ने उनी आफुसँगै अन्य दृष्टिबिहीनहरुलाई पनि हातेमालो गर्दै रक क्लाइम्बिङ र र्याफ्टिङको अनुभव बटुले । त्यसपछि ब्लाइन्ड रक्सको टोलीलाई पोखराको आकाशमा उड्ने हुटहुटी बढ्यो र सोमबारको सेडुअल बन्यो । यो पनि पढ्नुहोस पोखराको आकाशमा ‘ब्लाइन्ड रक्स’ (फोटोफिचर) सृष्टिसँगै अन्य ११ जना (सम्भवी दवाडी (सुनिता), नारायणी दवाडी, मीना भुजेल, मोम्सरा सुनार, चाँदनी शर्मा र रोजिना घिमिरे, क्रिष्टोफर जे जोन्स र थोमस सिड्लिङ (विदेशी), अमीता खड्का, वासिम अन्सारी र सहबाज अन्सारी) पोखराको खुला आकाशमा उडे । प्याराग्लाइडिङ गरे । जोसँग आँखाको दृष्टी नभएपनि मन र आत्माको दृष्टिले खुलेका हिमाल देखे, फेवाताल हेरे । यो कुरा सृष्टिले अवतरण पश्चात अनुभवमार्फत सुनाइन् । ब्लाइन्ड रक्सको अन्य टोलीले पहिलोपटक प्याराग्लाइडिङ गरेपनि सृष्टीले भने दोस्रो पटक प्याराग्लाइडिङको अनुभव बटुलिन् । उनीहरुलाई यो अवसर नेपाल हवाई खेलकुद संस्था (ना), लायन्स क्लब, पोखरा महानगरपालिकाले जुटाइदिएको हो । ‘हामीलाई यो अवसर जुटाइदिनुहुने ‘ना’ टिम, लायन्स क्लब र पोखरा महानगरपालिकाको मेयर सरप्रति आभारी छौ, उनले भनिन्, ‘दृष्टिबिहीनहरु पनि शासहिक गतिविधिमा सहभागि हुन सक्छन् भन्ने सन्देश दिन पायौ । यो अवसरका लागि धन्यवाद पोखरा ।’ सृष्टिसँग प्याराग्लाइडिङको अनुभव भएपनि त्यो महसुस अन्य साथीहरुलाई पनि गराउनु थियो । त्यसैले आफ्नै जोडबलमा सेडुअल बनाएको बताइन् । ‘यो भन्दा अगाडि पनि मैले प्याराग्लाइडिङ गरेको थिए, मैले त्यो बेलाको उत्साह सुनाएको भए उनीहरु सुन्नी मात्र थिए तर उनीहरु आफैले पनि महसुस गर्नुपर्छ भनेर यो सेडुअल बनाएका हौं,’ उनले भनिन् । ब्लाइन्ड रक्सको प्याराग्लाडिङले समावेशी पर्यटन प्रर्वद्धन गर्न टेवा पुर्याउने बताइन् । ‘शारीरिक अपाङ्गता भएको नागरिकलाई हेर्ने दृष्टिकोण समाजमा फरक छ’, केसीले भनिन्, ‘समावेशी पर्यटनको विकास गर्नका निम्ति नै प्याराग्लाइडिङ गरेका हौं । यसले केही सघाउ पुग्छ भन्ने हाम्रो विश्वास छ ।’ उनले जीवनमा सफलता प्राप्त गर्न दृष्टि मात्रै बाधक नहुने बताउदै भनिन्, ‘जीवनको उचाइमा पुग्न, सफलता हाँसिल गर्न दृष्टिबिहीनतामा सिमित हुनुहुदैन । त्यो भन्दामाथि उठ्न सक्छौ, उड्न सक्छौ त्यसैले जीवनमा सपना देख्न आँखा होइन, हिम्मत चाहिन्छ, आत्मबल चाहिन्छ ।’