बन्दीपुरमा ‘गाउँ पर्यटन मेला’
तनहुँ | बैशाख १९, २०८३
बन्दीपुर । पहाडी रानीका रूपमा परिचित तनहुँको पर्यटकीय नगरी बन्दीपुरमा शुक्रबारदेखि दुई दिने ‘गाउँ पर्यटन मेला’ सुरु भएको छ ।
गण्डकी प्रदेशका १० जिल्लाका ३० भन्दा बढी सामुदायिक होमस्टेका प्रतिनिधिहरू आफ्ना मौलिक संस्कृति, पहिचान र रैथाने स्वादसहित सहभागी भएपछि बन्दीपुरमा पर्यटकीय चहलपहल फेरिएको छ ।
नेपाल पर्यटन बोर्ड र बन्दीपुर गाउँपालिकाको संयुक्त आयोजना एव भिटोफ को सह आयोजना सुरु भएको मेलामा ग्रामीण जीवनशैली, स्थानीय उत्पादन र परिकारहरूको समृद्ध झलक प्रस्तुत गरिएको छ ।
मेलाको पहिलो दिन छिमेकी जिल्लाहरूबाट आएका आन्तरिक पर्यटकहरूको उल्लेख्य उपस्थिति रहँदा बन्दीपुर बजार उत्सवमय बनेको छ ।
बन्दीपुर गाउँपालिकाका अध्यक्ष सुरेन्द्रबहादुर थापाले गण्डकीका विभिन्न जिल्लाबाट आएका पाहुना र पर्यटकहरूको सहभागिताले बन्दीपुर यतिबेला ‘मिनी गण्डकी प्रदेश’ जस्तै देखिएको बताए ।
“हामीले बन्दीपुरको पुरानो शाखलाई कायम राख्दै ग्रामीण पर्यटनको प्रवद्र्धन गर्ने उद्देश्यले यो मेला आयोजना गरेका हौँ,“ उनले भने ।
मेलाको मुख्य आकर्षणका रूपमा विभिन्न जातजातिका सांस्कृतिक झाँकी, लोपोन्मुख कौरा नाच, सोरठी र घाटु नाच प्रस्तुत गरिएका छन् । प्रदर्शनीमा राखिएका ३० भन्दा बढी स्टलहरूमा ग्रामीण भेगका अर्गानिक कृषि उत्पादन र हस्तकलाका सामग्रीहरूले पर्यटकको ध्यान खिचेका छन् ।
पर्यटन बोर्डका वरिष्ठ निर्देशक मणिराज लामिछानेले यस्ता मेलाले ग्रामीण होमस्टे र सहरका पर्यटन व्यवसायीबीच सिधा सम्बन्ध स्थापित गर्ने विश्वास व्यक्त गरे ।
मेलाको दोस्रो दिन शनिबार ‘गाउँ पर्यटनबाट समृद्धिको यात्रा’ विषयमा विशेष प्यानल छलफल आयोजना गरिँदै छ ।
उक्त बहसमा टान गण्डकीका अध्यक्ष कृष्ण आचार्य, पर्यटनविद् आशुतोष प्रधान, डा. अनु कुमारी लामा र होमस्टे महासंघका केन्द्रीय उपाध्यक्ष प्रकाशचन्द्र गुरुङले बहस गरेका छन् । यस्तै, ‘कस्तो गाउँ ? कस्तो सहर !’ शीर्षकको अर्को संवादमा वरिष्ठ पर्यटन व्यवसायी भरत बस्नेत, टीकाराम सापकोटा, तारानाथ पहारी र सम्पादक आर. के. अदिप्त गिरीबीच बहस हुनेछ ।
बन्दीपुरलाई काठमाडौं, पोखरा र सौराहा जस्ता प्रमुख पर्यटकीय गन्तव्यहरूको केन्द्र (हब) का रूपमा विकास गर्ने लक्ष्य गाउँपालिकाले लिएको छ ।
ढुङ्गाले छापिएका कलात्मक घर, मौलिक संस्कृति र हिमशृङ्खलाको मनोरम दृश्यका लागि प्रसिद्ध बन्दीपुरमा आयोजित यस मेलाले समग्र ग्रामीण पर्यटन प्रवद्र्धनमा नयाँ ऊर्जा दिने आयोजकको अपेक्षा छ ।
काठमाडौं । नेपाल यातायात व्यवसायी राष्ट्रिय महासंघको अध्यक्षमा पून्यप्रसाद सिटौला (सरोज) निर्वाचित भएका छन् । पोखरामा भएको महासंघको सातौँ महाधिवेशनबाट सिटौला अध्यक्षमा निर्वाचित...
पोखरा । कास्कीको मादी गाउँपालिका ८ को आयोजनामा सबुपोखरी पदमार्गको प्रवद्र्धन गर्ने उद्देश्यसहित २ दिने हाइकिङको आयोजना गरिएको छ । नेपाल पर्यटन बोर्ड गण्डकी प्रदेश, अन्नपूर्ण संरक्षण क्षेत्...
कास्की —पोखराको अमरसिंह चोकबाट एक महिला बेपत्ता भएकी छन् । मादी गाउँपालिका ८ पाखुरीकोट मिजुरे माइतीघर भई हाल रामबजार बस्ने रितु गुरुङ विगत केही दिनदेखि बेपत्ता भएकी हुन् । ...
