विराटनगर किंग्सलाई पराजित गर्दै काठमाडौं गोर्खाजले नेपाल प्रिमियर लिग (एनपीएल) मा दोस्रो जित दर्ता गरेको छ। बिहीबार भएको खेलमा काठमाडौंले विराटनगरलाई नौ विकेटको फराकिलो अन्तरले हराएको हो। योसँगै काठमाडौले अंक तालिकामा ४ अंक जोडेको छ। पहिलो खेलमा जनकपुरसँग आठ विकेटले पराजित भएको काठमाडौंले दोस्रो खेलमा कर्णाली याकसलाई चार विकेटले हराएको थियो। दोस्रो जित हात पारेपछि काठमाडौंसँगै विराटनगर, कर्णाली, जनकपुर र सुदूरपश्चिमको समान चार अंक छ। लुम्बिनीको सात अंक छ। तीन खेलमा हार भोगेको पोखरा तालिकाको पुछारमा छ। चितवनको तीन अंक छ। विराटनगरले दिएको ८४ रनको झिनो लक्ष्य काठमाडौले ९.४ ओभरमा एक विकेटको क्षतिमा भेट्टायो।
काठमाडौँ । दसैँको अवधिमा देशभर भएका सवारी दुर्घटनामा परी १२४ जनाको मृत्यु भएको छ । प्रहरी प्रधान कार्यालयले दिएको जानकारीअनुसार देशभर भएको सवारी दुर्घटनामा १२४ जनाको मृत्यु भएको छ भने दुई हजार ९८८ जना घाइते भएका छन् । केन्द्रीय प्रहरी प्रवक्ता प्रहरी नायब महानिरीक्षक अविनारायण काफ्लेले गत असोज २५ देखि कात्तिक ८ गतेसम्म भएका एक हजार ३३९ सवारी दुर्घटनामा ८३ पुरुष, ३९ महिला, सात बालक र पाँच बालिकाको मृत्यु भएको जानकारी दिए । दुई हजार ९८८ जना घाइते भएका छन् । घाइतेमध्ये ४३७ जना गम्भीर र दुई हजार ५५१ जना सामान्य घाइते भएका छन् । उक्त अवधिमा सबैभन्दा बढी दुर्घटना कोशी प्रदेशमा ३९७ वटा भएका छन् भने सबैभन्दा कम मधेश प्रदेशमा ८० वटा दुर्घटना भएका छन् । काठमाडौँ उपत्यकामा १७१, बागमतीमा ११२, गण्डकीमा ९७, लुम्बिनीमा १६१, कर्णालीमा १७१ र सुदूरपश्चिम प्रदेशमा १५० वटा दुर्घटना भएका छन् । दुर्घटनामा सबैभन्दा बढी मोटरसाइकल सङ्लग्न रहेको प्रहरीले जनाएको छ । दुर्घटनामा एक हजार ५५२ मोटरसाइकल, ३३७ जिप तथा कार, २०७ टेम्पो, ७१ ट्रक तथा ट्याङ्कर ७१, ६४ माइक्रोबस, ५४ बस ५४, ३८ ट्याक्टर, १५ टिपर, १० डोजर, स्काभेटर तथा लोडर र १३३ अन्य सवारीसाधन रहेका छन् । गत वर्ष दसैँ अवधिमा देशभर एक हजार ४९२ वटा सवारी दुर्घटना भएका थिए । ट्राफिक नियम उल्लङ्घन गर्ने ५ हजारबढी चालकमाथि कारबाही दसैँको अवधिमा ट्राफिक नियम उल्लङ्घन गर्ने पाँच हजार ७०३ वटा सवारीसाधन चालकलाई कारबाही गरिएको प्रहरीले जनाएको छ । कारबाहीमा पर्नेमा मादकपदार्थ सेवन गरी सवारी चलाउने दुई हजार ७९४, क्षमताभन्दा बढी यात्रु बोक्ने एक हजार ८८२ र तीव्र गतिमा सवारी चलाउने ७४६ वटा रहेका छन् । यान्त्रिक परीक्षणसम्बन्धी मापदण्ड उल्लङ्घन गर्ने ८८, सवारीको छतमा यात्रु राख्ने ७३, बढी भाडा असुल्ने ५८, लागूपदार्थ सेवन गरी सवारी चलाउने ५३ रहेका छन् । केन्द्रीय प्रहरी प्रवक्ता काफ्लेका अनुसार चाडपर्वको समयमा लामो दूरीका सार्वजनिक सवारीसाधनमा यात्रुको चाप बढ्ने भएकाले यात्रुको सुरक्षा र सहजताका लागि विशेष व्यवस्था गरिएको थियो । देशभर ४०८ यात्रु सहायता कक्ष स्थापना प्रहरीले चाडपर्व लक्षित सुरक्षा योजनाअन्तर्गत देशभर ४०८ यात्रु सहायता कक्ष स्थापना गरेको थियो । अन्तरराष्ट्रिय सीमा नाकाका १०८ स्थानमा हेल्प डेस्क स्थापना गरी यात्रुलाई आवश्यक सूचना तथा सहायता प्रदान गरिएको प्रहरीले जनाएको छ । सवारी दुर्घटना न्यूनीकरणका लागि प्रहरीले ट्राफिक व्यवस्थापनसम्बन्धी जनचेतनामूलक कार्यक्रम सञ्चालन गर्नुका साथै विभिन्न प्रविधिको प्रयोगबाट सवारी आवागमनलाई व्यवस्थित बनाउने प्रयास गरेको थियो । दसैँपछि नजिकिँदै गरेका दीपावली, नेपाल संवत् तथा छठपर्वलाई लक्षित गरी प्रहरीले सवारी दुर्घटना न्यूनीकरण र सुरक्षित यात्राका लागि विशेष योजना कार्यान्वयन गरिरहेको छ ।
काठमाडौँ । प्रहरी प्रधान कार्यालयले विभिन्न कार्यालयमा कार्यरत रही लामो समयदेखि आफूखुसी गैरहाजिर रहेका ११ जना प्रहरी कर्मचारीहरूलाई बाटोको म्यादबाहेक सात दिनभित्र कार्यालयमा हाजिर हुन सार्वजनिक सूचना जारी गरेको छ। नक्सालस्थित प्रहरी महानिरीक्षकको सचिवालयअन्तर्गत कानुन तथा मानव अधिकार महाशाखाले मंगलबार एक सूचना प्रकाशित गर्दै गैरहाजिर हुनुको कारण सन्तोषजनक स्पष्टीकरणसहित उपस्थित हुन निर्देशन दिएको हो। खोजतलास गर्दा तथा प्रहरी नियमावली, २०७१ (संशोधनसहित) बमोजिमको प्रक्रिया पूरा गरी सूचना टाँस गर्दासमेत कार्यालयको सम्पर्कमा नआएपछि प्रहरी प्रधान कार्यालयले यो सामूहिक सूचनामार्फत उनीहरूलाई सफाइको अन्तिम मौका प्रदान गरेको छ। सूचनामा भनिएको छ, ‘तोकिएको अवधिभित्र आफू गैरहाजिर रहनुको कारण सन्तोषजनक स्पष्टीकरण जवाफसहित हाजिर नभए प्रहरी नियमावली, २०७१ (संशोधनसहित) को नियम ११३ को उपनियम (१) को खण्ड (च) को कसुरमा सोही नियमावलीको नियम १०९ को देहाय (ख) (१) बमोजिम सेवाबाट हटाउने कारबाही प्रक्रिया अघि बढाइनेछ।’ हाजिर हुन निर्देशन दिइएकाहरूमा जिल्ला सशस्त्र प्रहरी गुल्म बाराका प्रहरी हवल्दार दिलिप कुमार सिंह, प्रहरी प्रभाग दरबारस्क्वायर भक्तपुरका प्रहरी जवान अनिल परियार, प्रहरी प्रभाग सानेपा ललितपुरका प्रहरी जवान संगम बि.सी. र इलाका प्रहरी कार्यालय दिल्पा भोजपुरका प्रहरी जवान सञ्जीव राई रहेका छन्। त्यसैगरी प्रहरी चौकी चिलिङदिन पाँचथरका समीर लिम्बु, इलाका प्रहरी कार्यालय नवलपुर सिन्धुपाल्चोकका सन्तोष तामाङ, जिल्ला ट्राफिक प्रहरी कार्यालय कास्कीका विनोद दमै, इलाका प्रहरी कार्यालय रगदा जाजरकोटका टोप बहादुर सुनार, प्रहरी चौकी स्याउले डडेल्धुराका यसोदा कुमारी बोगटी, प्रहरी चौकी मेलबिसौना बझाङका करन बहादुर विष्ट र जिल्ला प्रहरी कार्यालय कैलालीका अमर सिंह साउदलाई पनि सात दिनभित्र हाजिर हुन भनिएको छ।
नेपाल प्रिमियर लिग (एनपीएल) मा कर्णाली याक्सले सुखद सुरुवात गरेको छ। आफ्नो पहिलो खेलमा जनकपुर बोल्ट्समाथि १९ रनको रोमाञ्चक जित हात पारेको हो। १३३ रनको लक्ष्य पछ्याएको जनकपुरलाई कर्णालीले ११३ रनमा अलआउट गर्यो। कर्णालीको जितमा युनिस ठकुरी र हुसेन तलातले समान ३ विकेट लिए। युनिसले ४ ओभरमा २२ तथा हुसेनले २६ रन खर्चिए। नन्दन यादवले २ विकेट हात पारे। उनले ललितलाई अन्तिम विकेटका रुपमा बोल्ड गर्दै २.३ ओभरमा १३ रन खर्चिए। सोमपाल कामीले १ विकेट हात पारे। जनकपुरका लागि अभिसेख तिवारीले बनाएको २० रन नै सर्वाधिक रह्यो। मोइन अली र कप्तान हर्मित सिंहले समान १९ रन जोडे। जिमी निशम १५ रनमा आउट हुँदा ओपनर मयन यादव १४ रनमा आउट भए। अनिल साहले ११ र कुसल परेराले ६ रन जोड्दा ललित राजवंशी र तृतराज दास १ रनमै आउट भए। आदित्य महताले रनको खाता नै खोल्न सकेनन्। राहुल यादव १ रनमा नटआउट रहे। कीर्तिपुरस्थित त्रिवि अन्तर्राष्ट्रिय क्रिकेट मैदानमा टस हारेर पहिले ब्याटिङ गरेको कर्णालीले २० ओभरमा ९ विकेट गुमाउँदै १३२ रन जोडेको थियो। कर्णालीका लागि नन्दन यादव १२ बलमा ९ रन, पवन सर्राफ ३७ बलमा ३७ रन, सोमपाल कामीले ५ बलमा १ रन जोडे। गुल्सन झा ९ बलमा १२ रन, अकबर अली २ बलमा १ रन, अरिफुल इस्लाम २९ बलमा ४३ रन, हुसेन तलात १३ बलमा ३ रन, दीपक डुम्रे ५ बलमा १३ रन र ओपनर मार्क वाट १ रनमै आउट भएका थिए। जनकपुरका कप्तान हरमित सिंहले ४ ओभरमा १ मेडनसहित २२ रन दिएर ३ विकेट लिए। मोइन अली र राहुल यादवले समान २ विकेट हात पारे। ललित राजवंशीले पनि १ विकेट लिए। ३ ओभर बलिङ गरेका उनले ३८ रन खर्चिए। निशम, आदित्य महता र अभिशेख तिवारीले भने विकेट लिन सकेनन्।
पोखरा। पोखरा अन्तर्राष्ट्रिय विमानस्थलबाट फ्लाई दुबईको उडानमार्फत वैदेशिक रोजगारीमा जाने नेपाली श्रमिकहरूका लागि पोखरामा स्वास्थ्य परीक्षण सेवा सुरु भएको छ । पोखरा स्वास्थ्य विज्ञान प्रतिष्ठान (पश्चिमाञ्चल क्षेत्रीय अस्पताल) ले आवश्यक कार्यविधि तयार गरी गत कात्तिक १ गतेदेखि नै यो सेवा औपचारिक रूपमा सञ्चालनमा ल्याएको हो । प्रतिष्ठानका निर्देशक सहप्राध्यापक डा. झपिन्द्र पोखरेलका अनुसार मन्त्रालयको प्राप्त पत्र तथा निर्देशनका आधारमा आवश्यक सम्पूर्ण तयारी र व्यवस्थापन मिलाएर तोकिएकै मितिदेखि स्वास्थ्य परीक्षण सुरु गरिएको हो । मन्त्रालयले पोखराबाट गन्तव्य मुलुकतर्फ जाने नागरिकहरूको स्वास्थ्य परीक्षण स्थानीय तहमै गर्ने गरी व्यवस्था मिलाउन पत्राचार गरेपछि प्रतिष्ठानले तत्काल कार्यविधि निर्माण गरी सेवा कार्यान्वयनमा ल्याएको उनले बताए । पोखरा अन्तर्राष्ट्रिय विमानस्थलबाट फ्लाई दुबईले अन्तर्राष्ट्रिय उडान सञ्चालन गरेसँगै यस क्षेत्रबाट रोजगारीका लागि विदेशिने युवाहरूलाई सहज बनाउन यो कदम चालिएको हो । यसअघि पोखरा र आसपासका जिल्लाका नागरिकहरू स्वास्थ्य परीक्षण तथा उडानका लागि काठमाडौँ धाउनुपर्ने बाध्यता थियो । पोखरामै स्वास्थ्य परीक्षणको व्यवस्था भएपछि वैदेशिक रोजगारीमा जाने युवाहरूको समय, श्रम र अनावश्यक आर्थिक भार बचत भएको छ । अस्पतालले अन्तर्राष्ट्रिय मापदण्ड अनुसारका स्वास्थ्य परीक्षणका लागि आवश्यक जनशक्ति र उपकरणको उचित व्यवस्थापन मिलाएको छ । कात्तिक १ गतेदेखि सेवा सुरु भइसकेकाले अब फ्लाई दुबईमार्फत यात्रा गर्ने यात्रुहरूले प्रतिष्ठानबाटै सहज रूपमा स्वास्थ्य जाँच गराई यात्रा अनुमति लिन सक्ने वातावरण बनेको निर्देशक डा. पोखरेलले बताए । क्षेत्रीय स्तरमै यो सेवा उपलब्ध भएपछि पोखरा विमानस्थलको अन्तर्राष्ट्रिय उडान सेवालाई समेत थप प्रभावकारी बनाउन मद्दत पुगेको छ ।
पोखरा — स्वर्गीय दीपक गुरुङको स्मृतिमा पोखरा रंगशाला परिसरमा वृक्षारोपण गरिएको छ । कोने घोथाने घोण्डे तमु समाज यूकेका अध्यक्ष कुमार गुरुङ र प्रथम महिला मीना गुरुङको पहलमा आयोजित कार्यक्रममा स्वर्गीय गुरुङप्रति श्रद्धाञ्जली अर्पण गर्दै विभिन्न प्रजातिका वृक्षारोपण गरिएको हो । सो कार्यक्रमका प्रमुख अतिथिसमेत रहेकी गण्डकी प्रदेश सभा सदस्य सरस्वती गुरुङले सांसद गुरुङले प्रवासमा रहेर पनि मातृभूमिप्रतिको उत्तरदायित्व र स्नेह स्वरूप सामाजिक, सांस्कृतिक एवं धार्मिक क्षेत्रमा योगदान गर्ने प्रवासी नेपालीहरूको प्रशंसा गरिन् । सांसद गुरुङले मातृभूमिप्रतिको माया शब्दमा सीमित नराखी व्यवहारमा उतार्नुपर्नेमा जोड दिँदै सो प्रकारका रचनात्मक कार्यले सामाजिक उत्तरदायित्व र हरियाली प्रवद्र्धनमा टेवा पु¥याउने उल्लेख गरिन् । उनले रोपिएका बिरुवा हुर्कंदै जाँदा स्वर्गीय दीपक गुरुङप्रतिको आत्मीयता र स्मृति सधैँ ताजा रहने विश्वास व्यक्त गरिन् । कोने घोथाने घोण्डे तमु समाज यूकेले नेपालमा पु¥याउँदै आएको सामाजिक, सांस्कृतिक तथा धार्मिक योगदानको सम्मान हुनुपर्नेमा जोड दिँदै प्रदेश सांसद गुरुङले स्वर्गीय दीपक गुरुङको स्मृतिमा गरिएको वृक्षारोपणले वातावरण संरक्षण, सामाजिक उत्तरदायित्व र भावी पुस्ताका लागि हरियाली प्रवद्र्धन गर्ने सन्देश दिनेमा विश्वास व्यक्त गरेकी थिइन् । यस्तै कोने घोथाने घोण्डे तमु समाज यूकेका अध्यक्ष कुमार गुरुङले बढ्दो प्राकृतिक विपत्ति न्यूनीकरण र वातावरण संरक्षण वर्तमानको अनिवार्य आवश्यकता भएको धारणा राखे । उक्त अवसरमा कास्की जिल्ला खेलकुद विकास समितिका अध्यक्ष मिलन गुरुङ, युवा नेता विक्की गुरुङ, ध्रुव गुरुङ, विनोद गुरुङ र रूपा गुरुङ लगायतले वृक्षारोपण गरेका थिए ।
पाल्पा । बगनासकाली गाउँपालिका–६, दान्सिँघामा गाउँस्तरीय पुरुष तथा खुला महिला भलिबल प्रतियोगिता आयोजना हुने भएको छ । स्थानीयस्तरमा सक्रिय जनज्योति युवा क्लबले बडा दशैंको अवसर पारेर प्रतियोगिता आयोजना गर्न लागेको हो । क्लबका अध्यक्ष दुर्गा बहादुर बरालले खेल कात्तिक ९ गतेदेखि सुरु हुने जानकारी दिए । उनका अनुसार कानुङ प्राविको खेलमैदानमा हुने सो प्रतियोगितामा पुरुषतर्फ प्रथम हुने टिमले नगद रु ४० हजार, ट्रफी, मेडल तथा प्रमाणपत्र प्राप्त गर्नेछ । यस्तै द्वितीय हुनेले नगद रु ३० हजार, तृतीय हुनेले नगद रु १५ हजारसहित ट्रफी, मेडल तथा प्रमाणपत्र प्राप्त गर्नेछ । भने, सान्त्वना स्थान हाँसिल गर्ने टिमले नगद रु ७ हजार हात पार्नेछ । टिम दर्ता भने ४ हजार रुपैयाँ निर्धारण गरिएको अध्यक्ष बरालले बताए । यस्तै महिलातर्फ प्रथम हुने टोलीलाई नगद रु १३ हजार, द्वितीय हुनेलाई ९ हजार र तृतीयलाई ६ हजारसहित ट्रफी, मेडल तथा प्रमाणपत्र प्रदान गरिने खेल संयोजक मदन बरालले जानकारी दिए । उनका अनुसर टिम दर्ता शुल्क ७ सय ५५ रुपैयाँ तोकिएको छ । प्रतियोगितामा सहभागी जनाउनका लागि कात्तिक ७ र ८ गते भित्र टिम दर्ता गरिसक्नुपर्ने आयोजकले जनाएको छ ।
पोखरा — जेनजी प्रदर्शनका क्रममा कास्की जिल्ला कारागारबाट फरार भएका सहकारी ठगीसम्बन्धी कसुरका एक प्रतिवादी पक्राउ परेका छन्। जिल्ला प्रहरी कार्यालय कास्कीका अनुसार पोखरा महानगरपालिका–२९ पटनेरीका ४५ वर्षीय उत्तम मगरलाई प्रहरीले पक्राउ गरेको हो। मगर सहकारी ठगीसम्बन्धी कसुरमा पुर्पक्षका लागि कास्की जिल्ला कारागारमा थुनामा रहेका थिए। गत सालकाे भदौ २४ गते भएको जेनजी प्रदर्शनका क्रममा उनी कास्की कारागारबाट फरार भएका थिए। फरार मगरको खोजीका क्रममा नेपाल प्रहरी प्रदेश कार्यालय पोखरा र जिल्ला प्रहरी कार्यालय कास्कीबाट खटिएको संयुक्त प्रहरी टोलीले २०८३ असोज १८ गते ललितपुर जिल्ला प्रहरी परिसरको सहयोगमा ललितपुरको महालक्ष्मी नगरपालिका–४ सानोगाउँबाट पक्राउ गरेको हो। पक्राउ परेका मगरलाई आवश्यक कारबाहीका लागि कास्की जिल्ला कारागारमा बुझाइएको जिल्ला प्रहरी कार्यालय कास्कीले जनाएको छ।
पर्वत । अविरल वर्षाका कारण आएको बाढीपहिरोबाट प्रभावित पर्वतको फलेवास नगरपालिका ८ ठाना मौला, सल्यानीधाराका २० घरपरिवारलाई विश्वकर्मा समाज नेपालले राहत सामग्री वितरण गरेको छ । विश्वकर्मा समाज नेपाल, केन्द्रीय कार्यालय कास्कीले घटनास्थलमै पुगेर प्रभावित परिवारलाई खाद्यान्नका समाग्री सहयोग गरेको हो । कार्यक्रममा विश्वकर्मा समाज नेपालका अध्यक्ष बेलबहादुर विश्वकर्माले प्रतिपरिवार एक बोरा चामल, नुन, तेल, सोयाबिन, दाल, चिनी, चियापत्ती र आलुलगायतका खाद्यान्न सामग्री सहयोग गरिएको जानकारी दिए । उनका अनुसार प्रभावित परिवारलाई खाद्यान्नसँगै ओछ्याउनका लागि म्याटसमेत प्रदान गरिएको छ । अध्यक्ष विश्वकर्माले प्राकृतिक विपद्का कारण स्थानीयवासीले भोग्नुपरेको पीडा र क्षतिप्रति दुःख व्यक्त गर्दै प्रभावित परिवारको वर्तमान अवस्था बुझेर राज्यले उनीहरूको उचित व्यवस्थापन र पुनःस्थापनाका लागि आवश्यक पहल गर्नुपर्नेमा जोड दिए । उनका अुनसार बाढीपहिरोका कारण गाउँका कतिपय परिवारका घर आंशिक रूपमा भत्किएका छन् भने कतिपयका घर पूर्ण नष्ट भएका छन् । उक्त पीडित परिवारको सुरक्षित बसोबास सुनिश्चित गर्न तथा उनीहरूलाई सामान्य जीवनमा फर्काउन सम्बन्धित निकायले गम्भीरतापूर्वक ध्यान दिनुपर्ने उनको माग छ । यस्तै पीडित परिवारका सदस्यहरूले विपद्को यस कठिन घडीमा विश्वकर्मा समाज नेपालले आफ्नो समुदायप्रति चासो देखाउँदै घटनास्थलमै उपस्थित भएर सहयोग र हौसला प्रदान गरेकोमा आभार व्यक्त गरेका थिए । विश्वकर्मा समाज नेपालको यस मानवीय पहलले विपद्बाट प्रभावित परिवारलाई तत्काल राहत प्रदान गर्नुका साथै समुदायबीच आपसी सहयोग, सद्भाव र एकताको सन्देशसमेत प्रवाह गरेको छ । राहत वितरण कार्यक्रममा फलेवास नगरपालिकाकी उपप्रमुख शोभा क्षेत्री तथा सम्बन्धित वडाका वडाध्यक्ष मानबहादुर कुँवर लगायतको सहभागिता रहेको थियो ।