नुवाकोटः नुवाकोटको लिखु गापास्थित सिन्दुरे खोलको बगरमा पुरिएको अवस्थामा सरकारी नम्बरप्लेटको मोटरसाइकल फेला परेको छ । सशस्त्र प्रहरी बलको १९ नम्बर गुल्मले उक्त मोटरसाइकल फेला पारेको हो । गुल्मका प्रहरी नायब निरीक्षक भाइमान राउतको टोलीले बगरमा मोटरसाइकलको ह्याण्डिल जस्तो वस्तु देखेर हिलो पन्छाई हेर्दा मोटरसाइकल फेला परेको जनाइएको छ । प्रदेश ३–०२–००१ ब २५५ नम्बरको सरकारी नम्बर प्लेटको मोटरसाईकल फेला परेपछि सशस्त्रले नेपाल प्रहरीलाई बुझाएको छ । हाल उक्त मोटरसाइकलबारे अनुसन्धान सुरु गरेको जिप्रका नुवाकोटले जनाएको छ ।
सरकारले मतदान केन्द्र कायम गरिएका विद्यालयमा तीन दिन बिदा दिने निर्णय गरेको छ। प्रधानमन्त्री तथा मन्त्रीपरिषद् कार्यालयको निर्णय अनुसार शिक्षा मन्त्रालयले आगामी २८ गतेदेखि ३० गतेसम्म तीन दिन मतदान स्थल तथा मतदान केन्द्रहरू रहेका विद्यालयहरू बन्द गर्ने निर्णय गरेको हो। यस्तै ३१ गते शनिबार परेको छ। जेठ १ गतेदेखि शनिबार र आइतबार गरी साताको दुईदिन बिदा दिने सरकारी निर्णयअनुसार जेठ १ गते आइतबार पनि विद्यालय बन्द हुनेछ। जेठ २ गते बुद्धजयन्तीको सार्वजनिक बिदा परेको छ। चिर्वाचनका लागि र सार्वजनिक विदा गरि देशभरका विद्यालय ६ दिन बन्द हुने भएका छन ।
जाजरकोट: अवैध रुपमा विक्रीका लागि लैजाँदै गरेको काईनेटिक ढुङगा सहित एक युवालाई प्रहरीले पक्राउ गरेको छ । जिल्लाको जुनीचाँदे गाउँपालिका– ६ गर्खाकोटका २२ वर्षीय सुरत सिंहलाई पक्राउ गरिएको जनाएको छ । प्रहरी चौकी छेडाबजारले सवारीसाधन चेकजाँच गर्ने क्रममा शिवालय गाउँपालिका– १ छेडाबजारमा प्लास्टिक झोला भित्र काईनेटिक ढुङगा (पत्थर) नौ किलोग्राम पाँच सय ग्राम बरामद गरि युवालाई पक्राउ गरिएको जिल्ला प्रहरी कार्यालयका प्रमुख प्रहरी नायव उपरिक्षक सन्तोष निरौलाले जानकारी दिनुभयो । कर्णाली प्रदेश ०२००१ च ०४९६ नम्वरको बोलेरो पिकअप जीपमा सवार युवालाई कार्वाहीको लागि खानी तथा भुगर्व विभाग अन्तर्गत पठाईएको प्रहरीले जनाएको छ । जाजरकोटको जुनिचाँदे र कुशे गाउँपालिकामा वहुमुल्य पत्थरखानीहरु प्रसस्तै मात्रामा पाइने गरेको स्थानीयबासीको भनाई छ ।
पोखराः पोखरा महानगरपालिकाअन्तरगत नेकपा एमाले वडा नम्बर १७ को घरदैलो कार्यक्रम जारी छ । घरदैलो कार्यक्रममा वडाध्यक्ष उम्मेदवार राधिका शाही योगीले यसपटक पनि वडामा जीतको निरन्तरता हुने बताएकी छिन् । गठबन्धनबाट कुनै पनि चुनौति नरहेको भन्दै योगीले १७ नम्बर वडा एमालेको लालकिल्ला रहेको बताइन् । यस वडामा योगीसँग सदस्यहरुमा शिवराम भन्डारी, विक्रम गुरुङ, विष्णुमाया थापा र तारा सेवा चुनावी मैदानमा छन् ।
नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले रुखका साथीहरुलाई हँसिया हथौडामा भोट हाल्न गाह्रो भएकोे महशुस गरेको बताएका छन् । भरतपुरमा आयोजित गठबन्धनको चुनावी सभामा बोल्दै प्रचण्डले कांग्रेसका वक्ताले बोलेको कुराबाट आफुलाई केही असहज महशुस भएको उल्लेख गरेका हुन् । उनले केही धम्कीको शैलमा भने, ‘यो गठबन्धन लोकतन्त्र र गणतन्त्रको आवश्यकता होइन भनेर भोट हाल्नु भएन भने देश गम्भीर दुर्घटनामा जानेछ ।’ त्यस्तै, लाल सलाम र जय नेपालको सम्बन्ध हालको चुनावमा नबनेको उनले बताएका छन् । तीस वर्षे पञ्चायत शासनलाई हटाउन नेपाली कांग्रेस र संयुक्त वाममोर्चाको गठबन्धनबाटै सम्बन्धको सुरुवात भएको बताउँदै प्रचण्डले अहिलेको आवश्यकताले झनै गाढा बनेको उल्लेख गरे । त्यसपश्चात् जनयुद्धलाई टुंग्याउन गिरिजाप्रसाद कोइरालाको पहलमा भएको १२ बुँदे सम्झौतासम्म आइपुग्दा झांगिएको सम्बन्धको परिणाम नै अहिलेको गठबन्धन भएको स्पष्ट पारे । पटकपटकको आन्दोलनमा माओवादी र कम्युनिष्टहरु कांग्रेससँग हातेमाले गरेको भन्दै उनले त्यसैको पछिल्लो स्वरुप गठबन्धन भएको प्रष्ट्याएका छन् ।
नेकपा समाजवादीका अध्यक्ष माधवकुमार नेपालले भरतपुर महानगरपालिकामा रेणु दाहाललाई मतदान गर्न अपील गरेका छन् । भरतपुरमा आयोजित गठबन्धनको चुनावी सभामा सम्बोधन गर्दै अध्यक्ष नेपालले भने ‘रेणु दाहाल मेयरका उत्कृष्ट उम्मेदवार हुन् समाजवादीका सम्पूर्ण साथीहरुले मतदान गरेर जिताउनुहोस् ।’ आफुले ५० औं वर्ष राजनीति गरेको बताउँदै उनले भने गठबन्धनले विभिन्न क्षेत्रमा गरेको तालमेललाई सबैले स्वीकार्नुपर्छ । लोकतन्त्र र संविधानको रक्षा गर्ने, समाजवादको यात्रामा अघि बढ्ने हो भने गठबन्धनको विकल्प नरहेको उनले स्पष्ट पारे ।
झापा- नेकपा (एमाले) मेचीनगरले बागी उम्मेद्वार बनेका र तिनलाई सघाएको आरोपमा आठ जनालाई कारबाही गरेको छ । मेचीनगरमा एमालेको उपप्रमुखको आधिकारिक उम्मेदवार मीना पोखरेल उप्रेतीविरुद्ध बागी उम्मेदवारी दिनुभएका डिल्लीराम घिमिरेसहित विभिन्न जिम्मेवारीमा रहेका आठ कार्यकर्तालाई पार्टीको सदस्यता समेत नरहनेगरी कारबाही गरिएको पार्टीका नगर अध्यक्ष राजु पोखरेलले जानकारी दिनुभयो । उपप्रमुखमा बागी उम्मेदवारी दिनुभएका घिमिरे एमालेको क्षेत्रीय कमिटीको संयोजक हुनुहुन्थ्यो । पार्टीबाट निष्काशित हुनेमा उपप्रमुखको बागी उम्मेदवार घिमिरेका समर्थक र प्रस्तावक क्रमशः दीपक घिमिरे र खिलबहादुर गिरी हुनुहुन्छ । वडा नं २ का आधिकारिक उम्मेदवार दीपक बरालविरुद्ध बागी उम्मेदवारी दिनुभएका तिलक न्यौपाने र उहाँको समर्थक बस्नुभएका मेघनाथ बाँस्तोलालाई पनि एमालेले कारबाही गरेको छ । बागी उम्मेदवार न्यौपानेको प्रचार प्रसारमा लागेका सोही वडाका पार्टी अध्यक्ष भानु ढुङ्गेल, तुलसा धिताल र हरिचरण चौलागाईलाई समेत अनुशासन उल्लङ्घन गरेको आरोपमा एमालेले कारबाही गरेको छ । वडा नं ७ को वडाध्यक्षमा एमालेका बागी उम्मेद्वार नेत्रप्रसाद दाहाललाईसमेत पार्टीको सदस्यसमेत नरहने गरी निष्काशित गरिएको पार्टीका नगर अध्यक्ष पोखरेलले बताउनुभयो ।
माेरङ – प्रधानमन्त्री तथा नेपाली कांग्रेसका सभापति शेरबहादुर देउवाले आफ्नो पार्टीको सरकार बनेपछि ६५ वर्षमाथिका नागरिकलाई ज्येष्ठ नागरिक भत्ता दिने बताउनुभएको छ । नेपाली कांग्रेस मोरङले आज बुधवार विराटनगरमा गरेको आमसभालाई सम्बोधन गर्दै प्रधानमन्त्री देउवाले अन्तर्राष्ट्रिय मापदण्डअनुसार नै ६५ वर्षमाथिका ज्येष्ठ नागरिकलाई सरकारले विशेष सुविधा दिने गरेअनुसार नै भत्ता दिने बताउनुभयो । ‘हामीले यसअघि नै ६५ वर्षमाथिकालाई भत्ता दिने निर्णय गरेका थियौँ, एमाले अध्यक्ष ओलीले मान्दै मान्नुभएन’, देउवाले भन्नुभयो । आमसभामा देउवाले सुकुम्वासीलाई जग्गा दिन थालेको, विकास निर्माणले गति लिएको, सबै नागरिकलाई कोरोनाविरुद्धको खोप दिएको लगायतका काम सरकारले गरेको बताउनुभयो । यस्तै उहाँले पाँच दलीय गठबन्धन अहिलेको आवश्यकता भएकाले कसैले कसैलाई धोका दिन नहुने बताउनुभयो । केपी शर्मा ओलीको प्रतिगमनलाई पाँच दल मिलेर परास्त गरेको र आफू प्रधानमन्त्री भएको भन्दै देउवाले गठबन्धन राष्ट्रिय आवश्यकता रहेको जिकिर गर्नुभयो ।
काठमाण्डाै – सरकारले यही वैशाख ३० गते (शुक्रवार) हुने पालिका चुनावमा सबै मतदान केन्द्र नजिकै खोप केन्द्र पनि राख्ने भएको छ । स्वास्थ्य तथा जनसङ्ख्या मन्त्रालयकी प्रवक्ता डा.संगीता कौशल मिश्राले सबै मतदान केन्द्रमा खोप केन्द्र राखेर कोरोना भाइरसविरुद्धको खोप लगाउने जानकारी दिनुभयो । मन्त्रालयको नियमित पत्रकार सम्मेलनमा प्रवक्ता मिश्राले मतदान केन्द्रसँगै खोप केन्द्र पनि रहने भएकोले बुस्टर डोज नलगाएको भएमा मतदान गर्न जाँदा खोप कार्ड पनि लिएर जान आग्रह गर्नुभयो । उहाँले खोप कार्ड सम्भव नभएको खण्डमा परिचयपत्र वा अभिभावकले नाम र उमेर घोषणा गरेको परिचयपत्रका आधारमा खोप दिइने व्यवस्था गरिएको बताउनुभयो ।